Aziz Toshpoʻlatov Oʻzbekiston aralash jang sanʼati (MMA) assotsiatsiyasi raisi etib saylandi
IIV rahbari bir vaqtning oʻzida voleybol federatsiyasi raisi ham sanaladi.
Ichki ishlar vaziri Aziz Toshpoʻlatov Oʻzbekiston aralash jang sanʼati (MMA) assotsiatsiyasi raisi lavozimiga saylandi. Bu haqda xabar Oʻzbekiston Milliy olimpiya qoʻmitasining Instagram sahifasida maʼlum qilindi.
Oʻzbekiston MMA assotsiatsiyasi 2019 yil noyabr oyida tashkil etilgandi. Unga dastlab hozirda Milliy olimpiya qoʻmitasi raisining birinchi oʻrinbosari sifatida faoliyat yuritayotgan Otabek Umarov rahbarlik qilgan.
Eslatib oʻtamiz, Aziz Toshpoʻlatov bir vaqtning oʻzida Oʻzbekiston voleybol federatsiyasi raisi lavozimini ham egallab kelyapti. Bu lavozimga u 2025 yil aprelda saylangandi.