Prezident marhum Ismoil Joʻrabekov xonadoniga bordi
Qurʼon tilovat qilinib, duo oʻqildi. Joʻrabekov bosh vazirining birinchi oʻrinbosari, Davlat suv nazorati boshligʻi, Prezident maslahatchisi lavozimlarida ishlagandi.
Prezident davlat va jamoat arbobi, suv xoʻjaligi vazirining maslahatchisi marhum Ismoil Joʻrabekov xonadoniga bordi.
Qurʼon tilovat qilinib, duo oʻqildi.
Davlat rahbari marhumning ezgu ishlarini, Vatanimizga xizmatlarini yodga oldi.
Ismoil Joʻrabekov 1931 yil 12 sentabrda Samarqand shahrida ishchi oilasida tugʻilgan. Mehnat faoliyati davomida suv xoʻjaligi sohasida masʼul lavozimlarda mehnat qilib, respublikamizda irrigatsiya va melioratsiya sohasini rivojlantirishga munosib hissa qoʻshdi. 1985 yilda Oʻzbekiston Vazirlar Kengashi raisining birinchi oʻrinbosari etib tayinlandi.
Mustaqillik yillarida I.Joʻrabekov Oʻzbekiston Respublikasi Bosh vazirining birinchi oʻrinbosari, Davlat suv nazorati boshligʻi, Oʻzbekiston Respublikasi Prezidentining Davlat maslahatchisi lavozimlarida ham samarali faoliyat olib bordi.
Soʻnggi yillarda I.Joʻrabekov moʻʼtabar yoshda boʻlishiga qaramasdan, suv xoʻjaligi vazirining maslahatchisi sifatida xizmat qilib, Yangi Oʻzbekistonni barpo etishga qaratilgan keng koʻlamli islohotlarni amalga oshirishda faol ishtirok etdi.
Davlat va jamoat arbobi “Oʻzbekiston Respublikasida xizmat koʻrsatgan irrigator” faxriy unvoni hamda davlatimizning bir qator yuksak mukofotlari bilan taqdirlangan edi.
Davlat rahbari marhumning farzandlari va yaqinlariga hamdardlik bildirib, sabr-toqat tiladi.
Ismoil Joʻrabekov joriy yil 28 sentabr kuni vafot etgan edi.