Fargʻonada soliq katta inspektori 30 ming dollar bilan ushlandi
U qishloq xoʻjaligiga moʻljallangan 48 sotix yerni yuqori lavozimda ishlovchi tanishlari orqali xaridor nomiga rasmiylashtirib berish evaziga pul soʻragan.
Soliq idorasi xodimiga 30 ming dollar bilan ushlandi.
Fargʻona viloyati Davlat soliq boshqarmasining tadbirkorlikni qoʻllab quvvatlash – xizmat koʻrsatish boʻlimi katta inspektori oʻz ukasiga 2023 yilda Fargʻona tumani hududidan elektron auksion orqali 30 yil muddatga ijara asosida berilgan, qishloq xoʻjaligiga moʻljallangan 48 sotix yer maydonini yuqori lavozimda ishlovchi tanishlari orqali xaridor nomiga rasmiylashtirib berish evaziga 30 000 AQSh dollari talab qiladi.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida oʻtkazilgan tezkor tadbir davomida soliq idorasi xodimi ushbu pul mablagʻini olgan vaqtida ashyoviy dalillar bilan ushlandi.
Hozirda unga nisbatan Jinoyat Kodeksining 25,168-moddasi 4-qismi “a” bandi bilan jinoyat ishi qoʻzgʻatilib, tergov harakatlari olib borilmoqda.
Avvalroq DXX tomonidan bojxona va soliq inspektorlari ushlangandi.
Jumladan, “Navoiy” chegara bojxona posti inspektori 7 kg oltinni hujjatsiz oʻtkazib berish evaziga 5 ming dollar olgan.