Tramp Pfizer bilan yirik kelishuvga erishdi
AQShda aholi dori-darmonlarni chegirma bilan sotib olishlari mumkin boʻlgan TrumpRx onlayn-doʻkonini ishga tushirildi. Pfizer esa mahsulotlar narxini pasaytirishga rozi boʻldi.
AQSh prezidenti Donald Tramp mamlakatda dori-darmon narxini pasaytirish boʻyicha muhim rejani eʼlon qildi. Bu haqda CNN telekanali xabar berdi.
U amerikaliklar dori-darmonlarni chegirma bilan sotib olishlari mumkin boʻlgan TrumpRx toʻgʻridan-toʻgʻri onlayn-doʻkonini ishga tushirdi, shuningdek, Pfizer farmatsevtika kompaniyasi bilan koʻplab mahsulotlar narxini pasaytirish boʻyicha kelishuvga erishdi.
Tramp, Qoʻshma Shtatlar "dunyodagi sogʻliqni saqlash tizimini endi subsidiya qilmasligini" eʼlon qildi.
Pfizer AQSh prezidentning barcha talablariga rozi boʻlgan birinchi kompaniya boʻldi. U dori-darmonlarni "eng qulay davlat tamoyili" asosida sotadi - bu hamkor mamlakatlarda mavjud boʻlgan eng past narxlar boʻladi.
Koʻpgina birlamchi tibbiy yordam dori-darmonlari va baʼzi bir markali dorilar TrumpRxʼda oʻrtacha 50% chegirma bilan sotiladi. Buning evaziga kompaniya farmatsevtika importi boʻyicha maʼlum tariflardan uch yil muddatga ozod qilinadi va Qoʻshma Shtatlardagi tadqiqot va ishlab chiqarishga qoʻshimcha 70 milliard dollar sarmoya kiritadi.
Bu tashabbus amerikaliklar dori-darmonlar uchun boshqa rivojlangan mamlakatlar aholisiga qaraganda qariyb uch baravar koʻproq pul toʻlagani sababli paydo boʻldi. May oyida Tramp farmatsevtika kompaniyalaridan amerikalik bemorlarga "eng qulay davlat" (MFN) narxlarini taklif qilishni talab qiluvchi farmon chiqardi. Iyul oyida u 17 ta yirik farmatsevtika kompaniyasining bosh direktorlariga talablar roʻyxati va muddat (29 sentabr) koʻrsatilgan xatlar yubordi.
Biroq, CNN tomonidan keltirilgan ekspertlar bu choralarning samaradorligiga shubha qilmoqda. Prezident kompaniyalarni bunday narxlarni belgilashga majburlash uchun qonuniy vakolatga ega emas. Baʼzi ekspertlarning fikricha, farmatsevtika kompaniyalari AQShda narxlarni pasaytirishdan koʻra, boshqa mamlakatlarda narxlarni koʻtarish ehtimoli koʻproq.
Tramp dori narxlarini 1500 foizga pasaytirishga vaʼda berdi, ekspertlar buni matematik jihatdan imkonsiz deyishadi. Farmatsevtika sanoati MFN koʻrsatmalari jiddiy oqibatlarga olib kelishi va Amerikaning sanoatdagi yetakchiligiga putur etkazishi mumkinligi haqida ogohlantiradi.
Avvalroq Tramp AQShda ishlamoqchi boʻlgan xorijliklar uchun 100 ming dollardan pul undirish boʻyicha farmonni imzolagandi.
Bu H-1B ishchi vizasiga taalluqli. Katta toʻlov sabab kompaniyalar xorijliklarni ishga olmasligi mumkin.