Oʻzbekiston va Ozarbayjon U-20 jahon chempionatiga mezbonlik qiladi
Bu haqda FIFA Kengashining navbatdagi yigʻilishida qaror qilindi. Bir yil avval Oʻzbekistonda futzal boʻyicha jahon chempionati tashkil etilgandi.
Oʻzbekiston va Ozarbayjon 2027 yilgi FIFA U-20 Jahon chempionatiga mezbonlik qiladi. Bu haqda OʻFA xabar berdi.
Bugun FIFA Kengashining navbatdagi yigʻilishi boʻlib oʻtdi. Yigʻilishda kun tartibidan oʻrin olgan muhim masalalar qatorida 2027 yilgi 20 yoshgacha futbolchilar oʻrtasidagi FIFA Jahon chempionati mezbonlari aniqlandi.
Unga koʻra, Oʻzbekiston va Ozarbayjon birgalikda yoshlar oʻrtasidagi mundialga mezbonlik qilishi belgilandi. Mazkur musobaqa FIFA tomonidan oʻtkaziladigan milliy terma jamoalar oʻrtasidagi Jahon chempionatidan keyingi ikkinchi nufuzli musobaqa hisoblanadi.
Eslatib oʻtamiz, 2024 yilda Oʻzbekistonda FIFA futzal Jahon chempionati tashkil etilgandi.