"Yaqin kunlarda barcha bolalarga ruxsat etiladi": Zaharlangan tarbiyalanuvchilar haqida maʼlumot berildi
Ularning 13 nafarining ahvoli oʻrtacha ogʻirlikda, deydi Sanepidqoʻmita raisining birinchi oʻrinbosari Nurmat Otabekov.
Sanepidqoʻmita Toshkent viloyatining qator maktabgacha taʼlim muassasalarida bolalarda oshqozon-ichak faoliyati buzilishi bilan bogʻliq vaziyat boʻyicha axborot berdi.
Qoʻmita raisining birinchi oʻrinbosari Nurmat Otabekovga koʻra, zaharlangan bolalarning 959 nafariga klinik belgilar boʻlmagani uchun darhol javob berilgan.
Hozirgi kunda Toshkent viloyatidagi shifoxonalarda 694 nafar bolalar davolanmoqda. Ulardan 13 nafarining ahvoli oʻrtacha ogʻirlikda.
27 sentabr kuni yana 421 nafar bolaga ahvoli yaxshilangani sabab uyga javob berish rejalashtirilgan. Poytaxtdagi 17 ta tibbiy muassasadan 100 nafardan oshiq mutaxassis va professorlar jarayonga jalb etilgan.
SSV tashkil etgan shtab xulosasiga koʻra, bolalarga oʻtkir gastentrit tashxisi qoʻyildi. Bu kasallik ogʻir oqibatlarga sabab boʻlmaydi.
"Hozirda ijobiy dinamika kuzatilmoqda. Tez kunlarda barcha bolalarga uyga javob beriladi", deya maʼlum qildi Nurmat Otabekov.
Yuz bergan holat yuzasidan laboratoriya tekshiruvlari oʻtkazilmoqda.
Eslatib oʻtamiz, 24 sentabr kuni Toshkent viloyatida bogʻcha bolalari kefirdan zaharlandi.
Kefir Oqqoʻrgʻon tumanidagi sexlarning birida ishlab chiqarilgan. Zaharlanganlar soni salkam 2 ming nafargacha yetdi.