Surxondaryoda "Damas" piyodalar oʻtish joyida uch kishini urib ketdi
Harakat vaqtida avtomobilning rul boshqaruv qurilmasida nosozlik yuzaga kelgan. Piyodalar shifoxonaga yetkazildi.
Surxondaryoda "Damas" piyodalar oʻtish joyida uch kishini urib ketdi. Bu haqda viloyat IIB xabar berdi.
22 sentabr kuni Shoʻrchi tumani “Navroʻz” mahallasi hududidan oʻtuvchi avtomobil yoʻlida 1998 yilda tugʻilgan haydovchi boshqargan “Damas” avtomashinasida harakat vaqtida rul boshqaruv qurilmasida nosozlik yuzaga kelgan. Natijada mashina qarama-qarshi boʻlakka chiqib ketib, yoʻlni tartibga solinmagan piyodalar oʻtish joyidan kesib oʻtayotgan 3 nafar piyodani turtib yuborgan.
Natijada piyodalar olgan tan jarohatlari sababli tuman tibbiyot birlashmasiga yetkazilgan.
Hozirda holat yuzasidan Shoʻrchi tumani IIB tomonidan yoʻl-transport hodisasi oqibatida olgan tan jarohatining ogʻirlik darajasini, hamda transport vositasining texnik holatini aniqlash maqsadida sudga oid tibbiy va texnik ekspertiza tayinlangan. Tergovga qadar surishtiruv harakatlari olib borilmoqda.
Avvalroq Shahrisabzda maktab oʻquvchisini bosib ketishiga bir bahya qolgan haydovchi jazolangandi. Haydovchi bola piyodalar oʻtish joyida harakatlanayotganiga qaramay toʻxtamagan.