AQSh poytaxtida qotillik uchun oʻlim jazosi joriy etildi
Vashingtonda bu chora avvalroq mavjud edi, ammo 1981 yilda shahar kengashi uni bekor qilgandi. Tramp maʼmuriyati hududda qotillik darajasi yuqori ekanini aytib keladi.
AQSh prezidenti Donald Tramp Vashingtonda qotillikda ayblanganlar uchun oʻlim jazosini joriy etish toʻgʻrisidagi farmonni imzoladi. Bu haqda Oq uy matbuot xizmati xabar berdi. Shaharda bu chora avvalroq mavjud edi, ammo 1981 yilda Vashington shahar kengashi uni butunlay bekor qilgandi.
Amerika rahbarining fikricha, bu qaror poytaxtning alohida maqomi bilan bogʻliq. Oq uyning taʼkidlashicha, Kolumbiya okrugining soʻnggi yillarda olib borayotgan yumshoq siyosati jinoyatchilikning koʻpayishiga olib keldi va bu aholi, tashrif buyuruvchilar va federal idoralarga xavf tugʻdirdi.
Bayonotda aytilishicha, Vashington mamlakatdagi eng xavfli shaharlardan biri boʻlib, 2024 yilda qotillik darajasi har 100 ming aholiga 27,3 ni tashkil qiladi. Bu mamlakatdagi qotillik darajasi boʻyicha toʻrtinchi oʻrinda turadi - Nyu-Yorkdagidan deyarli olti baravar yuqori.
“Biz oʻyin oʻynamayapmiz”, dedi Tramp va Milliy gvardiya qoʻshinlari yuborilganidan soʻng, soʻnggi toʻrt hafta ichida Vashingtonda birorta ham qotillik qayd etilmaganini taʼkidladi.
"Vashingtonda odamlarni oʻldirganlar oʻlim jazosiga duchor boʻlishadi", dedi u va buyruq darhol kuchga kirishini qoʻshimcha qildi.
Bosh prokuror Pem Bondi AQSh maʼmuriyati oʻlim jazosini butun mamlakat boʻylab kengaytirishga intilayotganini aytdi.
Bir necha hafta avval AQShda Trampning mashhur tarafdorlaridan biri Charli Kirk otib oʻldirilgandi.
Kirk maktablar, kollejlar va universitetlarda konservativ qadriyatlarni targʻib qiluvchi harakatga asos solgandi. Tramp bu voqeadan keyin mamlakatda bayroqlarni yarim tushirishni buyurdi.