Senator Toshkentdagi tirbandliklarda viloyatliklarni aybladi
Har kuni millionga yaqin kishi poytaxtga keladi. Toshkent viloyatidan minglab avtomobillarning ertalab poytaxtga kirib, kechqurun ortga qaytishi tirbandliklarni kuchaytirishi taʼkidlangan.
Senatning Byudjet va iqtisodiy masalalar qoʻmitasi raisi Erkin Gadoyev poytaxtdagi tirbandliklarda viloyatliklarni aybladi.
Senator tomonidan yuborilgan senator soʻrovida "poytaxt yoʻllarida yuzaga kelayotgan tirbandliklar aholining kundalik hayotiga jiddiy taʼsir koʻrsatayotganiga eʼtibor qaratilgan".
"Maʼlumotlarga koʻra, har kuni 1 millionga yaqin kishi poytaxtga tashrif buyuradi, ularning 275 ming nafari Toshkent viloyatidan kelmoqda. Viloyatning tutash hududlaridan minglab avtomobillarning ertalab poytaxtga kirib, kechqurun ortga qaytishi esa tirbandliklarni yanada kuchaytirmoqda", deyiladi soʻrovda.
Senator soʻrovida vazirlikdan Toshkent shahrida tirbandliklarni kamaytirish boʻyicha amalga oshirilayotgan choralar, “Intellektual transport” tizimining amaldagi holati, jamoat transportini yagona aglomeratsiya tizimiga oʻtkazish jarayoni, shuningdek, Prezident tomonidan belgilangan vazifalar ijro etilishi va ularning kechikishi sabablari yuzasidan atroflicha maʼlumot taqdim etish soʻralgan.
Maʼlumot uchun, senator Erkin Gadoyev Buxoro viloyatining Shofirkon tumanida tugʻilgan.