B2 sertifikati boʻlmagan oʻqituvchilarning yil oxirigacha ishlashiga ruxsat berildi
Bu haqda vazir buyrugʻi chiqdi. Oʻqituvchilardan yil oxirigacha bunday sertifikatni olish uchun imtihonlarda qatnashishi haqida tilxat olinadi.
Maktablarda B2 darajadagi chet tili sertifikatiga ega boʻlmagan oʻqituvchilarning yil oxirigacha ishlashiga ruxsat berildi. Bu haqda Maktabgacha va maktab taʼlimi vaziri Eʼzozaxon Karimovaning buyrugʻi eʼlon qilindi. Buyruq 2025 yil 15 sentabrda imzolangan.
Ayni paytda ulardan yil oxirigacha bunday sertifikatni olish uchun imtihonlarda ishtirok etishi haqida tilxat olinadi.
Vazirlik quyi boʻgʻinlari tomonidan sertifikatsiz oʻqituvchilarning imtihonga tayyorgarlik koʻrishi uchun oʻquv mashgʻulotlari tashkillashtiriladi.
Eslatib oʻtamiz, Vazirlar Mahkamasining 2021 yil 19 maydagi qarori bilan, 2024-2025-oʻquv yilidan boshlab barcha xorijiy tillar oʻqituvchilari kamida B2 sertifikatiga ega boʻlishi shartligi belgilab qoʻyilgan edi.
Ammo pedagoglar va jamoatchilik vakillarining murojaatlari sababli qaror ijrosi bir yilga uzaytirilgandi. Yaʼni 2025/2026-oʻquv yilidan boshlab kuchga kirishi kutilgandi.