Qirgʻiziston parlamenti tarixda ilk bor oʻzini oʻzi tarqatib yuboradi
Aslida parlament saylovlari 2026 yil boʻlishi kerak edi. 2027 yil esa prezident saylovlari boʻlib oʻtadi.
Qirgʻiziston parlamenti tarixda birinchi marta oʻzini oʻzi tarqatadi.
Jogorku Keneshning (parlament) Konstitutsiyaviy qonunchilik qoʻmitasi parlamentning oʻzini oʻzi tarqatib yuborish tashabbusini maʼqulladi, deb xabar beradi 24.kg nashri.
Deputat Ulan Primovga koʻra, saylovni 2026 yilda emas, 2025 yilda oʻtkazish siyosiy xavf-xatarlardan xalos boʻlib, hokimiyat tarmoqlari faoliyatida barqarorlikni taʼminlaydi. Parlamentda tashabbusni qoʻllab-quvvatlovchi 32 nafar imzo toʻplagan.
Deputatning taʼkidlashicha, oʻz-oʻzini tarqatib yuborish qarori mamlakat tarixida birinchi boʻladi.
“Ketma-ket ikki saylov kampaniyasini — parlament va prezidentlik kampaniyasini tashkil etish tizimga haddan tashqari yuk boʻlib, xato va qonunbuzarliklarga olib kelishi mumkin”, — deya qoʻshimcha qildi u.
Muhokama yakunlari boʻyicha qoʻmita aʼzolari taklifni qoʻllab-quvvatladilar va hujjat koʻrib chiqish uchun Muvofiqlashtiruvchi kengashga yuborildi. Ular yakuniy qaror qabul qilinadigan yigʻilish sanasini belgilaydilar.
Eslatib oʻtamiz, 2020 yilgi parlament saylovi natijalari sabab yuz bergan namoyishlar mamlakatda hokimiyat almashinuviga olib kelgandi. Oʻshanda amaldagi prezident Sooranbay Jeenbekov isteʼfo bergandi.