Abdulla Aripov Qirgʻiziston poytaxtiga bordi
Turkiy davlatlar hukumat rahbarlari bu yerda iqtisodiyot, savdo, transport, raqamlashtirish, energetika va qishloq xoʻjaligi boʻyicha yigʻilish oʻtkazadi.
Oʻzbekiston bosh vaziri Abdulla Aripov Bishkekka bordi. Bosh vazir u yerda Turkiy davlatlar tashkilotiga (TDT) aʼzo davlatlar hukumat rahbarlari va vitse-prezidentlari yigʻilishida ishtirok etadi.
Aripovni “Manas” xalqaro aeroportida Qirgʻiziston Vazirlar Mahkamasi raisi oʻrinbosari, suv, qishloq xoʻjaligi va qayta ishlash sanoati vaziri Bakit Toroboyev kutib oldi.
Bugun Bishkekda boʻlib oʻtadigan yigʻilishda tashkilotga aʼzo davlatlarning hukumat rahbarlari va yuqori mansabdor shaxslari hamkorlikning ustuvor yoʻnalishlari, jumladan, iqtisodiyot, savdo, sarmoya, transport, raqamlashtirish, energetika va qishloq xoʻjaligi kabi sohalarni muhokama qiladi.
Turkiy davlatlar tashkiloti turkiy mamlakatlarni birlashtiruvchi hukumatlararo organ boʻlib, uning Bosh kotibiyati Istanbulda joylashgan.