Oʻzbekistonda islomiy bank faoliyatini yoʻlga qoʻyish maqsadida qator qonunlarga oʻzgartirish kiritilishi mumkin

Oʻzbekistonda islomiy bank faoliyatini yoʻlga qoʻyish maqsadida bir qator qonun hujjatlariga tegishli oʻzgartirish va qoʻshimchalar kiritilishi mumkin.

OʻzLiDeP fraksiyasining 15 sentabr kungi yigʻilishida bu masala koʻtarildi. Unda “Oʻzbekiston Respublikasining ayrim qonun hujjatlariga Oʻzbekistonda islomiy bank faoliyatini joriy qilishga qaratilgan oʻzgartirish va qoʻshimchalar kiritish toʻgʻrisida”gi qonun loyihasi ham muhokama qilindi.

Taʼkidlanganidek, islomiy moliyada savdo va sherikchilik orqali moliyalashtirish keng qoʻllaniladigan moliyalashtirish shakllari hisoblanib, qonunchilikda tijorat banklari tomonidan bunday shakllardan foydalanilishiga bir qator toʻsiqlar mavjud.

Xususan, islomiy moliyalashtirishda banklar savdo bilan shugʻullanish orqali mijozni moliyaviy qoʻllab-quvvatlasa, Oʻzbekistonda tijorat banklari savdo bilan bevosita shugʻullanishlari mumkin emas.

Islomiy moliyada moliyalashtirishni sheriklik asosida amalga oshirishga ruxsat etilgan boʻlib, mamlakatimizda tijorat banklariga yuridik shaxslarni tashkil etish yoki ularning ustav kapitallarida qatnashishga doir cheklovlar oʻrnatilgan.

Shu munosabat bilan, yuqoridagi qayd etilgan holatlarni bartaraf etish va Oʻzbekistonda islomiy bank faoliyatini yoʻlga qoʻyish maqsadida bir qator qonun hujjatlariga tegishli oʻzgartirish va qoʻshimchalar kiritish talab etiladi.

Mazkur Qonunning qabul qilinishi natijasida Oʻzbekistonda Islomiy moliya institutlari uchun buxgalteriya hisobi va audit tashkiloti (AAOIFI) hamda Islom moliyasi xizmatlari kengashi (IFSB) standartlariga mos keluvchi islomiy bank faoliyati uchun zarur huquqiy asos yaratiladi.

Ushbu Qonun Oʻzbekistonda islomiy banklar va islomiy “darcha”lar faoliyatini yoʻlga qoʻyish, “yashirin” iqtisodiyot ulushini kamaytirish, qolaversa mamlakatimizga islomiy bank faoliyatini rivojlantirishga yoʻnaltirilgan xorijiy investitsiyalarni jalb qilishga xizmat qiladi.