Oʻzbekiston BMTda Falastinni yoqlab ovoz berdi
BMT Bosh Assambleyasi Fransiya va Saudiya Arabistoni tashabbusi bilan ikki davlat asosidagi yechimni qoʻllab-quvvatlashga chaqiruvchi deklaratsiyani maʼqulladi.
Oʻzbekiston BMTda mustaqil Falastin davlati tuzilishini yoqlab ovoz berdi.
Birlashgan Millatlar Tashkiloti Bosh Assambleyasi Fransiya va Saudiya Arabistoni tashabbusi bilan ikki davlat asosidagi yechimni qoʻllab-quvvatlashga chaqiruvchi deklaratsiyani maʼqulladi. Nyu-York deklaratsiyasini 142 davlat yoqlab, 10 davlat qarshi, 12 davlat betaraf ovoz berdi.
Fransiya va Saudiya Arabistoni tomonidan taqdim etilgan taklif birinchi marta iyul oyida Nyu-York konferensiyasida qabul qilingan edi. Tashabbuskorlarning fikricha, Falastin davlatini yaratishda “qaytib boʻlmaydigan” yoʻl ochish kerak boʻlgan harakatlar rejasi mavjud.
Oʻn davlat hujjatga qarshi chiqdi. Ular ichida AQSh va Isroil bor.
Oʻzbekiston va uning barcha qoʻshnilari Falastinni qoʻllab ovoz bergan.
Avvalroq Isroil Gʻarbiy sohildagi ishgʻolni kengaytirish boʻyicha rejani tasdiqlagandi.
Yahudiy davlati ushbu hududga oʻz aholisini koʻchirib keltirishni koʻpaytirmoqda. Ushbu amaliyot xalqaro huquqqa muvofiq noqonuniy hisoblanadi.
Shuningdek, Shavkat Mirziyoyev Isroilning Qatarga hujumini qoralab chiqdi.