Shavkat Mirziyoyev Isroilning Qatarga hujumini qoraladi
Prezident Qatar amiri Shayx Tamim bin Hamad Ol Soniy bilan telefon orqali muloqot qildi.
Oʻzbekiston Prezidenti Shavkat Mirziyoyev 12 sentabr kuni Qatar davlati amiri Shayx Tamim bin Hamad Ol Soniy bilan telefon orqali muloqot qildi.
Suhbat avvalida davlatimiz rahbari yaqinda Isroil tomonidan Qatar poytaxti Doha shahriga uyushtirilgan raketa zarbalarini keskin qoraladi. Qatar mustaqilligi va suverenitetini buzadigan, uning xavfsizligiga tahdid soladigan bunday nomaqbul xatti-harakatlar Birlashgan Millatlar Tashkiloti Nizomi, xalqaro huquqning asosiy qoida va tamoyillariga zid ekani qayd etildi.
Shuningdek, Oʻzbekiston – Qatar strategik sheriklik va koʻp qirrali hamkorlik munosabatlarining dolzarb masalalari ham koʻrib chiqildi.
Oʻzbekiston xalqaro munosabatlarda kuch ishlatishning har qanday shakliga va Yaqin Sharqdagi vaziyatning yanada keskinlashishiga olib keladigan qadamlarga qarshi ekani taʼkidlandi.
Oʻzbekiston Prezidenti Qatar tashabbusi bilan chaqirilayotgan navbatdan tashqari arab-islom sammitining muvaffaqiyatli oʻtishini tiladi.
Eslatib oʻtish kerak, 3 kun avval Isroilning “HAMAS rasmiylarini yoʻq qilishga” urinishi tufayli Qatarga zarbalar bergandi.