Grippdan himoya qiluvchi universal preparat yaratildi
AQShlik olimlar dastlab sichqonlar ustida tajriba oʻtkazib koʻrdi. Hozirda dorining insonlarga moʻljallangan shakli ustida ish olib borilmoqda.
Jekson laboratoriyasi (AQSh) olimlari grippning deyarli barcha shtammlaridan, jumladan, pandemiya xavfi tugʻdiruvchi parranda va choʻchqa grippidan himoya qila oladigan tajribaviy terapiyani ishlab chiqdi. Ish natijalari Science Advance jurnalida chop etildi.
Odatda, grippga qarshi preparatlar virusli fermentlarga qaratilgan. Ammo bunday dorilar tezda oʻz samaradorligini yoʻqotadi: virus mutatsiyaga uchraydi va terapiya oʻz faoliyatini toʻxtatadi.
Yangi yondashuv boshqacha: tadqiqotchilar infeksiyalangan oʻpka hujayralarini taniydigan va belgilovchi uchta maxsus antitelalardan iborat preparatni yaratdilar. Keyin immunitet tizimi ularni yoʻq qiladi, tanani infeksiyadan tozalaydi.
Asosiy maqsad M2 virusli oqsilining kichik va deyarli oʻzgarmagan qismi edi. Bu barcha gripp shtammlarida bir xil va virusning koʻpayishi uchun zarurdir.
Sichqonlar ustida oʻtkazilgan tajribalar shuni koʻrsatdiki, preparat infeksiyadan bir necha kun oʻtib qoʻllanilsa ham taʼsir qiladi.
Hayvonlarning oʻpkalarida virus yuki kamaygan, ularning alomatlari yengillashgan va aksariyati tirik qolgan. Bundan tashqari, taʼsir immuniteti zaif boʻlgan sichqonlarda ham kuzatilgan.
Jamoa hozirda klinik sinovlar uchun mos keladigan preparatlarning insonlar uchun versiyasini yaratish ustida ishlamoqda. Kelajakda bunday dori mavsumiy epidemiyalar paytida yoki yangi pandemiya paytida favqulodda himoya sifatida ishlatilishi mumkin.
