AQShda Trampning mashhur tarafdorlaridan biri otib oʻldirildi
Charli Kirk maktablar, kollejlar va universitetlarda konservativ qadriyatlarni targʻib qiluvchi harakatga asos solgandi. Tramp bu voqeadan keyin mamlakatda bayroqlarni yarim tushirishni buyurdi.
Siyosiy faol va prezident Donald Tramp tarafdori Charli Kirk Yuta universiteti kampusidagi nutqi vaqtida otib tashlandi.
Kirkning boʻyniga oʻq uzilgan, u ogʻir ahvolda shifoxonaga yetkazilgan. Keyinroq AQSh prezidenti Donald Tramp Kirk vafot etganini aytdi.
Tramp oʻzining Truth Social ijtimoiy tarmogʻida mamlakat boʻylab bayroqlarni toʻrt kun davomida, yakshanba oqshomiga qadar motam belgisi sifatida yarim tushirishni buyurganini eʼlon qildi.
"Buyuk va afsonaviy Charli Kirk vafot etdi. Amerika Qoʻshma Shtatlaridagi yoshlarni Charlidan koʻra yaxshiroq tushunadigan va qaygʻuradigan hech kim yoʻq. Uni hamma yaxshi koʻrardi. Melaniya va men uning goʻzal rafiqasi Erika va oilasiga hamdardlik bildiramiz. Charli, biz sizni yaxshi koʻramiz!" deya yozgan Tramp.
31 yoshli Charli Kirk Trampning taniqli tarafdori va podkast boshlovchisi boʻlib, maktablar, kollejlar va universitetlarda konservativ qadriyatlarni targʻib qilish maqsadida AQShning Turning Point talabalar guruhiga asos solgan.
Kirkka 100-200 metr masofadan oʻq uzilgan. Mahalliy hukumat dastlab hujumda gumonlanuvchini qoʻlga olganini maʼlum qilgan, biroq keyinroq maʼlum boʻlishicha, otishma sodir etgan shaxs haligacha qoʻlga olinmagan.
Yuta shtati gubernatori, respublikachi Spenser Koks qotillik siyosiy sabablarga koʻra sodir etilganini aytdi.
"Bu bizning davlatimiz uchun qora kun. Men aniq aytmoqchiman: Bu siyosiy qotillik", - dedi gubernator Koks jurnalistlarga.