Chilonzorda qurilish krani qulashi oqibatida bir kishi halok boʻldi
Bundan tashqari 25 va 21 yashar ishchilar jarohat olgan. Hozirda tergov harakatlari davom etmoqda.
Chilonzorda qurilish krani qulashi oqibatida bir kishi halok boʻldi. Bu haqda Toshkent shahar IIBB xabar berdi.
Ijtimoiy tarmoqlarda Chilonzor tumanida minorali qurilish krani agʻdarilganligi aks etgan video tarqaldi.
IIBBga koʻra, joriy yilning 8 sentabr kuni Chilonzor tumani, Tirsakabod koʻchasida olib borilayotgan qurilish hududida, minorali qurilish kranini oʻrnatish jarayonida texnika xavfsizligi qoidalariga rioya qilinishi taʼminlamaganligi sababli kran qulab tushgan.
Natijada oʻrnatish ishlarini olib borayotgan yollanma ishchi 2000 yilda tugʻilgan L.A. olgan tan jarohatlari tufayli voqea joyida vafot etgan.
Shuningdek, yollanma ishchilar 2004 yilda tugʻilgan I.Q. hamda 2000 yilda tugʻilgan M.A. turli jarohatlar bilan shifoxonaga yotqizilgan.
Mazkur holat yuzasidan Chilonzor tumani IIO FMB Tergov boʻlimi tomonidan Jinoyat kodeksining 257-moddasi 2-qismi “a” va “b” bandlari ("Mehnatni muhofaza qilish qoidalarini buzish, odam oʻlishiga, boshqa ogʻir oqibatlar kelib chiqishiga sabab boʻlishi") bilan jinoyat ishi qoʻzgʻatilgan. Hozirda tergov harakatlari davom etmoqda.
