TIV rahbari Fransiya elchisidan ishonch yorliqlarini qabul qildi
Ualid Fuk yaqinda missiyasini yakunlagan Oreliya Bushez oʻrnida ish boshladi.
Oʻzbekiston TIV rahbari Fransiya elchisidan ishonch yorliqlarini qabul qildi.
Vazirga koʻra, Fransiya va Oʻzbekiston oʻrtasidagi munosabatlar soʻnggi yillarda yuqori surʼatlar bilan rivojlanib, strategik sheriklik darajasiga koʻtarilgan.
"Fransiyaning Oʻzbekistondagi yangi tayinlangan Elchisi Ualid Fuk janoblaridan ishonch yorliqlari nusxalari qabul qildik.
Bugungi kunda hamkorlik iqtisodiyotdan tortib madaniyatgacha boʻlgan barcha sohalarni qamrab olmoqda. Shu bilan birga, mavjud salohiyat yanada keng boʻlib, uni toʻliq roʻyobga chiqarish uchun diplomatlarimizning hamkorlikdagi saʼy-harakatlari muhim ahamiyat kasb etadi", deya maʼlum qildi tashqi ishlar vaziri Baxtiyor Saidov.
Eslatib oʻtamiz, avvalgi elchi Oreliya Bushez avgust oyida missiyasini yakunlagandi.