Bashar Asadni qamashga order berildi
Suriyaning Moskvaga qochgan sobiq lideriga urush jinoyati va boshqa ayblovlar qoʻyilgan.
Suriya sobiq rahbarini qamashga order berildi.
Fransiya Suriyaning sobiq prezidenti Bashar Assad va yana olti nafar yuqori martabali sobiq amaldorni hibsga olishga order berdi, deb xabar bermoqda France 24.
Maʼlumotlarga koʻra, bu 2012 yilda ikki jurnalistning oʻlimiga sabab boʻlgan Xoms shahridagi portlash bilan bogʻliq. Fransiya rasmiylari voqeani insoniyatga qarshi potensial jinoyat va urush jinoyati sifatida tekshirmoqda.
Bashar Asaddan tashqari, orderlar uning ukasi Maher Asad, 4-Suriya zirhli diviziyasining sobiq rahbari, razvedka boshligʻi Ali Mamluk va armiya shtabining sobiq rahbari Ali Ayubga tegishli.
Asad va Suriya
Eslatib oʻtamiz, Bashar Asad 2024 yil dekabrida hokimiyatdan agʻdarilgan edi. U oilasi bilan Rossiyadan boshpana olgan. Shundan beri omma koʻzidan chetda yashab kelmoqda.
Bashar Asad mamlakatni 2000-2024 yillarda boshqardi. 2011 yilda boshlangan namoyishlar qonli urushga aylanib ketdi. Yuz minglab kishilar halok boʻldi, millionlab kishilar esa qochoqqa aylandi.