Avgustda isteʼmol sektoridagi tovarlar 0,4 foizga oshdi
Asosiy oziq-ovqat mahsulotlaridan tarvuz, qovun, karam, kartoshka eng koʻp qimmatlagan.
Isteʼmol sektoridagi tovarlar va xizmatlar narxlari oʻrtacha 0,4 % ga oshdi. Bu haqda Milliy statistika qoʻmitasi maʼlumot berdi.
2025 yilning avgust oyida isteʼmol sektoridagi tovarlar va xizmatlar narxlari oʻrtacha 0,4 % ga oshgan.
Yillik isteʼmol narxlari indeksi (INI) 108,8 % ni tashkil etib, oʻtgan yilning shu oyiga (2024 yil avgust — 110,5 %) nisbatan 1,7 foiz bandga pasaydi.
Avgust oyida oziq-ovqat mahsulotlari narxlari oʻrtacha 0,6 % ga, nooziq-ovqat tovarlari 0,3 % ga hamda aholiga koʻrsatiladigan pullik xizmatlar esa 0,3 % ga qimmatlashgani kuzatilgan.
Asosiy oziq-ovqat mahsulotlaridan tarvuz (28,7 %), qovun (11,7 %), karam (11,4 %), kartoshka (3,5 %), tovuq tuxumlari (2,7 %), parranda goʻshti (1,9 %), paxta moyi (1,6 %), qoʻy goʻshti (1,4 %) hamda mol goʻshti (0,2 %) narxlarining oshishi inflyatsiyaga asosiy taʼsir koʻrsatdi.
Shuningdek, nooziq-ovqat mahsulotlar narxlaridan benzin (3,1 %) va sement (0,8 %) hamda xizmatlar narxi va tariflarida huquqiy turdagi xizmatlar (9,9 %), maishiy chiqindi uchun haq toʻlash (3,0 %) va erkaklar va oʻgʻil bolalar uchun sartaroshxona xizmatlari (1,0 %) narxlari qimmatlashgani inflyatsiyaga oshishiga asosiy omil boʻlib xizmat qildi.
Hisob-kitoblar uchun 10 mingdan ortiq savdo va xizmat koʻrsatish nuqtalarida 170 mingga yaqin narxlar qayd etilgan. 420 turdagi oziq-ovqat va nooziq-ovqat mahsulotlari va 90 turdagi xizmatlar narxlari kuzatildi.
Avvalroq Toshkent supermarketlarida kartoshka, pomidor va goʻsht arzonlashgani xabar berilgandi.
Limon narxi esa sezilarli qimmatlagan. Bu mavsumiy omil bilan izohlanmoqda.