Sentabr kam bulutli va quruq ob-havo bilan boshlanadi

Bu yil sentabr oyi qanday boʻladi? Gidrometeorologiya xizmati agentligi ehtimoliy prognozni ulashdi.

Oyning birinchi oʻn kunligida qulay harorat fonida asosan kam bulutli va quruq ob-havo boʻlishi kutilmoqda. Kechalari va erta tongda 15-20 daraja boʻlgan haroratda tetiklantiruvchi salqinlik seziladi, kunduz kunlari esa quyosh nurlari havoni 35 darajagacha, ayrim kunlarda 37 darajagacha isitadi.

Keyinchalik sentabr oyining oxirigacha harorat kechalari 15-20 dan 8-13 darajagacha, kunduz kunlari 30-35 dan 20-25 darajagacha oʻzgarib turishi kutilmoqda.

Sentabr oyida oʻrtacha oylik harorat meʼyor atrofida, baʼzi joylarda meʼyordan 1-1,5 darajaga yuqori boʻlishi kutilmoqda.

Oyning ikkinchi yarmida ayrim kunlarda (1-2 kun) qisqa muddatli yomgʻir yogʻishi mumkin.

Sentabr – kuz faslining birinchi oyidir, ammo Oʻzbekistonda u koʻpincha ob-havo sharoiti jihatidan biroz yumshoqroq harorat fonida, yozga oʻxshash boʻlishi kuzatiladi. Ushbu oyni baxmal mavsumi deb atash mumkin. Ertalablari tetiklantiruvchi salqinlik, iliq, ammo issiq boʻlmagan kunlar ob-havo sharoitini mamlakatimiz aholisi va mehmonlari uchun ayniqsa qulay qiladi.

Iqlimiy kuzatuv maʼlumotlariga koʻra, respublika hududining katta qismida oyning birinchi yarmida oʻrtacha kunduzgi harorat 30-33 darajani, oyning ikkinchi yarmida esa 26-29 darajani tashkil etadi.

Sentabr oyining eng iliq kunlarida termometr ustuni 35-37 darajagacha, janubda 39-40 darajagacha koʻtariladi.