Toshkentda 8 yoshli bemor operatsiya vaqtida vafot etdi
Prokuratura holat yuzasidan tekshirish oʻtkazib, jinoiy ish qoʻzgʻatdi.
Toshkentdagi tibbiyot markazida 8 yoshli bola vafot etdi.
Maʼlum qilinishicha, bola burun sohasida oʻtkazilgan rinoplastika amaliyoti vaqtida olamdan oʻtgan.
Sodir boʻlgan ushbu holatni Bosh prokuratura tasdiqladi. Mahkama xabariga koʻra, holat yuzasidan tekshirish harakatlari oʻtkazilgan.
Holatga aloqador shaxslarni batafsil soʻroq qilish, yuzlashtirish, qoʻp vaqt talab qilinadigan murakkab ekspertizalar tayinlash va boshqa bir qator tergov harakatlarini oʻtkazmasdan qonuniy toʻxtamga kelish imkoni yoʻqligi sababli Jinoyat kodeksining 116-moddasi (Kasb yuzasidan oʻz vazifalarini lozim darajada bajarmaslik) bilan jinoyat ishi qoʻzgʻatildi.
Barcha zarur tergov harakatlari oʻtkazilganidan soʻng ish boʻyicha qonuniy toʻxtamga kelinadi, deyiladi prokuratura xabarida.
Taʼkidlash kerak, 2023 yilda bloger Farhod Mannopov operatsiya qilinganidan keyin vafot etgandi.