Toshkent viloyatida qator vaqtinchalik hibsxonalar yopildi
Chinoz, Qibray va Yuqorichirchiq tumanlarida joylashgan muassasalarning sanitariya-gigiyena sharoitlari talabga javob bermagan.
Toshkent viloyatida bir qator vaqtincha saqlash hibsxonalari yopildi. Bu haqda Oliy Majlisning Inson huquqlari boʻyicha vakili matbuot xizmati xabar berdi.
Gap nima haqida?
Ombudsmanning Toshkent viloyatidagi mintaqaviy vakili hamda jamoatchilik guruhlari tomonidan 2025 yilning iyun oyida Quyichirchiq va Chinoz tumanlari IIB vaqtincha saqlash hibsxonalariga monitoring tashriflari oʻtkazilgan. Unda aniqlangan kamchiliklar yuzasida Ichki ishlar vazirligiga Ombudsman taqdimnomasi kiritilgan edi.
Ombudsmanga maʼlum qilinishicha, monitoringda aniqlangan kamchiliklarni bartaraf etish maqsadida tegishli chora-tadbirlar belgilanib, Quyichirchiq tumani IIB vaqtincha saqlash hibsxonasiga ventilyatsiya tizimi va radioeshittirish qurilmasi oʻrnatildi. Kameralar kerakli anjomlar bilan jihozlandi. Sayr qilish hovlisi va sanitariya tarmoqlari (hojatxona, yuvinish joyi)da taʼmirlash ishlari olib borilib, gigiyena talablariga muvofiqlashtirildi.
Shu bilan birga, shaxslarni saqlashning sanitariya-gigiyena qoidalari talablariga zid boʻlgan Chinoz, Qibray va Yuqorichirchiq tumanlaridagi vaqtincha saqlash hibsxonalari faoliyati Ichki ishlar vazirining 2025 yil 21 iyuldagi tegishli buyrugʻi bilan tugatildi.
Avvalroq Andijondagi hibsxonaning 6 xodimiga chora koʻrilgandi.
Ombudsman vakili hibsxonada sanitariya-gigiyena va moddiy-texnik taʼminotga oid jiddiy kamchiliklar, kanalizatsiya muammolari va majburiy mehnat holatlarini aniqlagan.