Prezident Mustaqillik bayrami munosabati bilan mukofotlarni topshirdi

Prezident Mustaqillik bayramida mukofotlanganlarga medallarni topshirdi.

Prezident Shavkat Mirziyoyevning farmonlariga muvofiq, Oʻzbekiston mustaqilligining oʻttiz toʻrt yilligi munosabati bilan turli sohalar vakillari faxriy unvonlar, orden va medallar bilan mukofotlangan edi.

Toshkent shahrida 27 avgust kuni ushbu mukofotlarni topshirish marosimi boʻldi.

Davlat rahbari barchani, avvalo, Mustaqillik bayrami bilan tabrikladi. Mamlakatimizda erishilayotgan natijalarning asosi, saʼy-harakatlarning mohiyati haqida alohida toʻxtaldi.

– Yangi Oʻzbekistonda ortga qaytmas tus olgan islohotlarimiz qanday ulkan natijalar berayotganini barchamiz koʻrib turibmiz. Oʻtgan sakkiz yilda yalpi ichki mahsulotimiz shiddat bilan oʻsib, 115 milliard dollarga yetdi. Bugun bitta raqamni birinchi marta aytmoqchiman: Xalqaro valyuta jamgʻarmasi prognoziga koʻra, bu yil iqtisodiyotimiz hajmi 130 milliard dollardan oshishi kutilmoqda. Yaʼni, ilgari bunday oʻsish, bunday yuksak eʼtirof hech qachon boʻlmagan, – dedi Shavkat Mirziyoyev.

Bunday natijalarga tadbirkorlik keng qoʻllab-quvvatlanayotgani, zamonaviy sanoat majmualari barpo etilayotgani, “yashil” va innovatsion iqtisodiyotga oʻtilib, muqobil energiya manbalari yaratilayotgani, axborot texnologiyalari, turizm va moliyaviy texnologiyalar kabi xizmat koʻrsatish tarmoqlari rivojlantirilayotgani zamin boʻlmoqda.

Yurtimizda zamonaviy shaharlar qad koʻtarmoqda, qishloq va mahallalar obod boʻlmoqda. Oʻtgan sakkiz yilda aholi uchun 500 mingdan ziyod koʻp qavatli uy-joylar barpo etildi. Bu mustaqillikning dastlabki 25 yiliga nisbatan toʻrt karra koʻp. Mahalla infratuzilmasini yaxshilash, qishloqlarni, yoʻllarni obod qilish uchun 60 trillion soʻm mablagʻ sarflandi. Yoki, 155 milliard dollar sarmoya hisobiga 100 mingdan ortiq investitsiya loyihalari ishga tushirildi, 7 milliondan ziyod aholi daromadli boʻldi.

– Bunday ulkan tarixiy yutuqlarimiz – oʻz vaqtida chuqur oʻylab olib borgan keng koʻlamli islohotlarimiz, eng muhimi, odamlarimizning tafakkuri, dunyoqarashi oʻzgargani samarasi, desak, ayni haqiqatni aytgan boʻlamiz. Qurayotgan binolarimiz, zamonaviy majmualar, qulay uy-joylar, maktab va bogʻchalar, tibbiyot, madaniyat va sport maskanlari misolida Yangi Oʻzbekistonning iqtisodiy qudrati va ulkan bunyodkorlik salohiyati yaqqol namoyon boʻlmoqda. Asosiysi, qaysi sohada boʻlmasin, har bir yutuq va natija, avvalo, inson qadrini ulugʻlash, uning huquq va manfaatlarini taʼminlashga xizmat qilmoqda, – dedi davlatimiz rahbari.

Soʻnggi sakkiz yilda ijtimoiy infratuzilmaga oldingi yillarga nisbatan olti karra koʻp mablagʻ yoʻnaltirildi. Natijada bogʻcha oʻrinlari 720 mingdan 2,5 millionga yetkazildi. 466 ta yangi maktab qurilib, 1 millionga yaqin oʻquvchi oʻrni yaratildi. Talabalar soni 279 mingdan 1,5 million nafarga oshirilib, oliy taʼlimda qamrov 40 foizga olib chiqildi.

Oʻtgan haftada Tadbirkorlar kuni munosabati bilan 168 nafar eng ilgʻor biznes vakillari, mirishkor dehqon va fermerlar davlatimizning yuksak mukofotlari bilan taqdirlangani qayd etildi.

– Bunday fidoyi yurtdoshlarimiz, ularning tashabbuslarini qoʻllab-quvvatlash va ragʻbatlantirishdan charchamayman. Albatta, bu bejiz emas. Barchangiz yaxshi bilasiz, bundan oʻn yil oldin biz asosan xomashyo eksport qilar edik. Hozirgi kunda esa, sanoat mahsulotlari hajmini 2016 yilgi 28 milliarddan 62 milliard dollarga yetkazdik. Agar vaqtida tadbirkorlik uchun qulay sharoitlar yaratib bermasak, bunday yutuqlarga erisha olarmidik? Yoʻq, albatta, – dedi davlatimiz rahbari.

Taʼkidlanganidek, bugun biznes vakillari iqtisodiyotimizning chinakam tayanchiga aylandi. Birgina qurilish sohasini oladigan boʻlsak, bu yoʻnalish oldin hech qachon hozirgidek jadal rivojlanmagan. Ilgari qurilishlar faqat davlat buyurtmasi asosida boʻlar edi. Bugun xususiy qurilish kompaniyalari soni 30 mingdan oshdi, qurilish materiallari ishlab chiqarish hajmi 6 milliard dollarga yaqinlashdi. Hozirgi kunda Oʻzbekiston tom maʼnoda ulkan qurilishlar maydoniga aylandi.

Birgina oʻtgan yilning oʻzida 23 milliard dollarlik qurilish ishlari amalga oshirildi. Bu 2016 yilga nisbatan 4 karra koʻp.

Bunday ulkan oʻzgarishlarni qishloq xoʻjaligi, toʻqimachilik, elektrotexnika, mashinasozlik, farmatsevtika kabi yoʻnalishlarda ham koʻrish mumkin.

Mamlakatimizda faqat sanoat bilan cheklanib qolmasdan, xizmat koʻrsatish sohalarini rivojlantirishga ham alohida ahamiyat berilayotgani taʼkidlandi.

– Avvallari 500 million dollarga yetmagan turizm eksporti hozir 3 milliard dollarlik marradan oshdi. Yetti-sakkiz yil oldin IT eksporti 1 milliard dollarga yetadi, desa, bunga kim ishonardi? Eng muhimi, barcha tarmoqlarga yangi ilm, zamonaviy texnologiyalar kirib keldi. Ularda yuz minglab ish oʻrinlari va yuqori malakali kadrlar armiyasi paydo boʻldi. Har bir sohada Yangi Oʻzbekistonning oʻz strategiyasi, tajriba maktabi shakllandi.

Mamlakatimizning ana shunday yangi tarixi, yangi qiyofasini yaratishda butun xalqimiz qatori siz, azizlarning ham munosib hissangiz bor va buning uchun barchangizga chuqur minnatdorlik bildiraman, – dedi Shavkat Mirziyoyev.

Prezident joylarda davlat mukofotlarini qabul qilib olayotgan vatandoshlarimizni ham tabrikladi.

Shundan soʻng, mukofotlanganlarga faxriy unvon, orden va medallar tantanali ravishda topshirildi.

Avvalroq prezident bosh prokuror, mudofaa va ichki ishlar vazirlari unvonini oshirgandi.