Tramp Toshkentda tugʻilgan yaqin odamini Hindistonga elchi qilib tayinlaydi
Serxio Gor Janubiy va Markaziy Osiyo ishlari boʻyicha maxsus elchi sifatida ham ishlaydi.
AQSh prezidenti Donald Tramp Serxio Gorni Vashingtonning Hindistondagi elchisi etib tayinlashini aytdi.
Serxio Gor, Trampning eng yaqin yordamchilaridan biri, hozirda Oq uy prezidentlik departamenti direktori lavozimida faoliyat yuritadi. U endilikda Nyu-Dehli bilan sovuqlashib borayotgan munosabatlarni oʻnglash boʻyicha ishlaydi.
Kelgusi haftada Hindistondan keladigan mahsulotlarga AQSh tariflarini ikki baravar oshirish rejalashtirilayotgani sababli ikki tomonlama aloqalar keskinlashdi.
Gor Janubiy va Markaziy Osiyo ishlari boʻyicha maxsus elchi sifatida ham ishlaydi, dedi AQSh prezidenti.
Donald Tramp oʻzining Truth Social platformasidagi postida Gor AQSh Senati tomonidan Hindistondagi lavozimga tasdiqlanmaguncha hozirgi lavozimida qolishini aytdi.
"Serxio koʻp yillar davomida men bilan birga boʻlgan ajoyib doʻstdir", dedi Tramp.
Vitse-prezident J.D. Vens ham tayinlovni olqishladi.
"Serxio yaxshi yigit va mamlakatimizning Hindistondagi ajoyib elchisiga aylanadi", deb yozdi u X tarmogʻida.
Gorning oʻzi Hindistondagi elchi sifatida xizmat qilish "sharaf" boʻlishini aytgan.
Qoʻshma Shtatlar va Hindiston oʻrtasidagi munosabatlar Trampning savdo urushi tufayli keskinlashgan.
Dunyoning beshinchi yirik iqtisodiyoti boʻlgan Hindiston oʻzining qishloq xoʻjaligi va sut sanoatini ochishga qarshilik koʻrsatganidan soʻng, past tarif stavkalari boʻyicha muzokaralar toʻxtab qoldi. Vashington va Nyu-Dehli oʻrtasidagi oʻzaro savdo hajmi har yili 190 milliard dollardan (164 milliard yevro) oshadi.
Toshkentda tugʻilgan amerikalik amaldor
Avvalroq Serxio Gor 1986 yil 30 noyabrda Toshkent shahrida tugʻilgani xabar berilgandi.
Gorning advokati bu maʼlumotni tasdiqlagan. Asli ismi Serjio Goroxovskiy boʻlgan bu shaxs Donald Tramp maʼmuriyatidagi eng qudratli shaxslardan biri sifatida koʻriladi.
Gorning bolaligi Maltada oʻtgan va u soʻng AQShga koʻchib oʻtgan.