Sudlar ishida sunʼiy intellektdan foydalaniladi
"Raqamli sud" konsepsiyasi asosida ishlarning yuritilishi bosqichma-bosqich elektron shaklga oʻtkaziladi.
Sudlar faoliyatida sunʼiy intellekt texnologiyalari joriy etiladi.
“Sudlar faoliyatiga sunʼiy intellekt texnologiyalarini joriy etish orqali odil sudlovga erishish darajasini oshirish hamda sud tizimining moddiy-texnik taʼminotini yaxshilashga doir qoʻshimcha chora-tadbirlar toʻgʻrisida”gi Prezident Farmoni (PF–140-son, 21.08.2025 y.) qabul qilindi.
Gap nima haqida?
Farmonga koʻra, sudlar faoliyatiga sunʼiy intellekt texnologiyalarini joriy etish hamda raqamlashtirish jarayonlarini jadallashtirishning ustuvor maqsadlari etib quyidagilar belgilandi, jumladan:
- sud ishlarini yuritishda qogʻoz shaklidan voz kechish maqsadida “Raqamli sud” konsepsiyasi asosida ishlarning yuritilishini bosqichma-bosqich toʻliq elektron shaklga oʻtkazish;
- sudlar faoliyatiga sunʼiy intellekt texnologiyalarini joriy etish uchun zarur texnik infratuzilma yaratish;
- Oliy sudning axborot tizimlari negizida sud hujjatlari arxivi modulini ishlab chiqish va amaliyotga joriy etish;
- sudlar faoliyatini raqamlashtirish boʻyicha “Kiber huquq” yoʻnalishida ilmiy tadqiqotlar oʻtkazish, shuningdek, sudyalar va sud apparati xodimlarining raqamli savodxonligi va malakasini doimiy oshirib borish.
“Raqamli sud” konsepsiyasini amalga oshirish doirasida:
-sudga ariza berishdan oldin sunʼiy intellekt yordamida sud muhokamasining taxminiy natijasi hamda sarflanadigan xarajatlar shakllantiriladi;
-murojaatlar sudga elektron shaklda yuboriladi;
-sud hujjatlari loyihalari avtomatik shakllantiriladi.
Avval qonunchilikda xayriya yigʻish boʻyicha aniq tartib belgilangani xabar berilgandi. Tartibni buzganlarga BHMning 3 baravaridan 5 baravarigacha jarima solinadi.