AQSh vizasini olgan 55 million kishi tekshiriladi

AQSh Davlat departamenti deportatsiya qilinishi mumkin boʻlganlarni aniqlash uchun 55 million qonuniy muhojirni qayta tekshirmoqchi.

Associated Press nashrining yozishicha, vizaning muddatidan oshib ketgani, jinoiy faoliyat bilan shugʻullangani, jamoat xavfsizligiga tahdid solganligi, terrorchilik faoliyatining har qanday shakli bilan shugʻullangani yoki terrorchilik tashkilotiga yordam bergani aniqlangan barcha migrantlar AQShDA yashash ruxsatnomasidan mahrum qilinadi.

Ularning hammasi deportatsiya qilinadi.

Davlat departamentiga koʻra, barcha AQSh vizasi egalari doimiy ravishda tekshiriladi va qonunbuzarlar deportatsiya qilinadi.

"Biz barcha mavjud maʼlumotlarni, jumladan, huquqni muhofaza qilish organlari maʼlumotlarini, immigratsiya yozuvlarini yoki viza berilganidan keyin amalga oshirilgan va mumkin boʻlmagan holatlarni koʻrsatadigan boshqa maʼlumotlarni koʻrib chiqamiz", - deya tushuntirdi Davlat departamenti.

Tramp va migratsiya siyosati

Bu eʼlon Tramp maʼmuriyati viza tizimi, ayniqsa, talaba vizasi egalari uchun nazoratni kuchaytirayotgan bir paytda paydo boʻldi.

Yanvar oyida AQShda tahsil olayotgan chet ellik talabalarning 6000 ga yaqin vizasi allaqachon bekor qilingan, shundan 4000 ga yaqini qonunni buzgan talabalar edi.

Davlat departamenti rasmiylarining taʼkidlashicha, deportatsiya qilingan talabalarning aksariyati mast holda mashina haydab, oʻgʻirlik yoki hujum qilgan holda ushlangan. 300 dan ortiq vizalar esa ularning egalari terrorizmni qoʻllab-quvvatlagani aniqlangach, bekor qilingan.

Departament vakillarining soʻzlariga koʻra, bu HAMAS uchun mablagʻ yigʻishni oʻz ichiga olgan.

Pew Research Center yaqinda oʻtkazgan tadqiqotga koʻra, Tramp ikkinchi muddatga kirishganda (2025, yanvar) Qoʻshma Shtatlarda 53,3 million muhojir istiqomat qilgan. Iyun oyi holatiga koʻra, ular 51,9 millionni tashkil etdi (atigi besh oy ichida 1,4 millionga kamaygan).