Oʻzbekiston termasi endi qaysi brend libosida harakatlanishi maʼlum boʻldi
7SABER brendi milliy jamoalar uchun libos tayyorlaydi. Oʻzbekiston termasi keyingi yil ilk bor JChda qatnashadi.
Endilikda milliy terma jamoalar 7SABER libosi ostida mamlakat sharafini himoya qiladi.
Oʻzbekiston futbol assotsiatsiyasi matbuot xizmati xabar berdi.
Jumladan, JCh-2026 yoʻllanmasini qoʻlga kiritgan terma jamoa Shimoliy Amerika maydonlarida ushbu brend futbolkalarida oʻynaydi.
"Tarixiy yoʻl — yangi bosqich! Milliy jamoa ilk bor FIFA Jahon chempionatida! Endilikda Oʻzbekiston terma jamoalari 7SABER libosi ostida mamlakatimiz sharafini himoya qilishadi! Katta orzular, katta turnirlar va katta gʻalabalar sari birgalikda!", — deyiladi OʻFA xabarida.
Taʼkidlash kerak, OʻFA futbol boʻyicha Oʻzbekiston terma jamoalari uchun liboslar yetkazib berish boʻyicha 2018 yildan buyon Germaniyaning JAKO kompaniyasi bilan hamkorlik qilib kelayotgandi.
JCh va Oʻzbekiston
Eslatib oʻtamiz, 2025 yil 6 iiyunda Oʻzbekiston BAA bilan durang oʻynab mundial yoʻllanmasini hal etdi.
10 iyunda esa Toshkentda Qatar yirik hisobda magʻlub etildi.