Hindistonlik muhojir Oʻzbekistonda vafot etdi

Hindistonning Telangana shtatida yashovchi oila xorijda vafot etgan qarindoshining jasadini 24 kundan beri kutmoqda. Bu haqda The Siasat Daily nashri yozdi.

Gap nima haqda?

Oʻzbekistonda ishlayotgan 33 yoshli mehnat muhojiri Sanga Suresh toʻsatdan vafot etgan.

Uning yaqinlari marhumni uyiga olib kelish uchun hukumatning zudlik bilan aralashuvini kutishmoqda.

Shtatning Nirmal tumanidagi Kottapedur qishlogʻida yashovchi Suresh turmush oʻrtogʻi, ikki yosh farzandi va oilasining kelajagini yaxshilash umidida xorijga ketgan. U avvalroq xususiy maktab oʻqituvchisi va Quvaytda yuk tashish boʻyicha ishlagan.

Suresh va uning qishlogʻidan yana toʻrt kishi viza uchun Lingapurdagi mahalliy sub-agent Kadam Mandalga 2,3 lakh rupiy toʻlagan. Toshkentga borishdan oldin ular Dehlida toʻqqiz kun boʻlishgan va u yerda Baxubal ismli Gujarati nazoratchisi tomonidan turistik mehmonxonada 15 kunlik bepul treningdan oʻtkazilgan. Vaʼda qilingan ish haqi oyiga 600 AQSh dollari edi.

21 iyul kuni, ish boshlaganidan atigi toʻrt kun oʻtib Suresh yurak xurujiga uchradi va shifoxonaga olib ketilayotganda yoʻlda vafot etdi.

Oʻshandan beri uning oilasi jasadni vataniga qaytarishga harakat qilmoqda. Ularning taʼkidlashicha, mahalliy agent jasadni joʻnatish uchun qoʻshimcha pul talab qilib, Haydarobodga emas, faqat Dehligacha transport tashkil qilishini aytib, jarayonni kechiktirmoqda.

11 avgust kuni Sureshning rafiqasi Sangha Mamatha ikki yosh farzandi va amakisi Jinka Bhomanna hamrohligida rasmiylar bilan uchrashdi. Mahalliy amaldor jasadni uyiga olib kelish uchun zudlik bilan chora koʻrishga ishontirdi.

Maʼlum boʻlishicha, Sureshning 2025 yil 10 iyundan 8 sentabrgacha amal qiladigan Oʻzbekiston sayyohlik vizasi boʻlgan.

Hindistonliklar va Oʻzbekiston

Avvalroq Oʻzbekistonda oʻqimoqchi boʻlgan hindistonliklar ogohlantirilgandi.

Hindiston tomoni toʻrtta OTMda oʻqimaslikni tavsiya qilgan, ularning uchtasi Belizda, bittasi Oʻzbekistonda joylashgan.