Rektorlarga oʻrinbosarlarni oʻzlari tayinlash vakolati beriladi
Prezident OTMlar bitiruvchilarini ishga joylashtirish boʻyicha yigʻilish oʻtkazyapti. Unda rektorlar vakolatini kengaytirish masalasi koʻrildi.
Rektorlar endilikda oʻrinbosarlarini oʻzlari tayinlaydi. Bu haqda prezident Shavkat Mirziyoyev tomonidan oʻtkazilayotgan yigʻilishda maʼlum qilindi. Unda bitiruvchilarni ishga joylashtirish va taʼlim jarayonlari koʻrilmoqda.
Bundan buyon bitiruvchilarni ishga joylashda oʻzini oʻzi band qilganlik inobatga olinmasligi belgilandi.
Gap nima haqida?
Prezident tashabbusi bilan OTM rektorlariga belgilangan vakolatlar kengaytirilmoqda. Davlat rahbari rektorlar vakolatini kengaytirish va masʼuliyatini oshirish boʻyicha yangi tizim joriy qilish zarurligini taʼkidladi.
“Yangi Oʻzbekiston” universitetida rektorlar maktabi orqali rektor va prorektorlikka nomzodlar maqsadli tayyorlanadi.
Oʻquv kursida eng yaxshi natija koʻrsatgan rektorlikka nomzodlar malaka oshirish uchun Garvard universitetiga yuboriladi.
Koʻp masalalarda rektorlarga mustaqillik beriladi. Avvalo, barcha oliygohlar tashkiliy va akademik mustaqil boʻladi.
Yaʼni, rektor oʻrinbosarlarini oʻzi tayinlaydi (amaldagi tartibga koʻra, vazirlik bilan kelishish kerak). Bunda har bir nomzod oliygoh kengashida oʻzining yillik dasturini himoya qiladi.
Rektorlar belgilangan moliyalashtirish va shtati doirasida professor-oʻqituvchilar va boshqaruv xodimlarini oʻzi taqsimlaydi.
Bundan tashqari, rektorlarga “super” kontrakt summasini tabaqalashgan holda belgilash vakolati beriladi.
Prezident yana bir tashabbusni ilgari surdi.
"Biz abituriyentlarga 5 ta oliygohni tanlash imkonini berdik. Bu – oliy taʼlimda katta sakrash, desak adolatdan boʻladi. Buni yanada kengaytiramiz, - dedi davlatimiz rahbari.
Endilikda abituriyentlar 5 ta oliygohdan birortasiga kirolmagan boʻlsa, lekin toʻplagan balli boshqa oliygohdagi toʻlmagan yoʻnalishga toʻgʻri kelsa, shu oliygoh rektori ularni kontrakt asosida qabul qilishi mumkin boʻladi.