Tramp Ozarbayjon va Armaniston yetakchilarini Oq Uyga taklif etdi
Ushbu uchrashuv yakunida tinchlik bitimi eʼlon qilinishi mumkin.
AQSh prezidenti Donald Tramp Ozarbayjon prezidenti Ilhom Aliyev va Armaniston bosh vaziri Nikol Pashinyanni Oq uydagi uchrashuvga taklif qildi.
Bu haqda The Washington Post xabardor manbalarga asoslanib xabar bermoqda.
Unda aytilishicha, uchrashuv 8 avgust, juma kuni Oq uyda boʻlib oʻtadi.
Nashrning qayd etishicha, Tramp shu tariqa uzoq vaqtdan beri davom etayotgan mojaroning yechimi boʻlishi kutilayotgan Yerevan va Boku oʻrtasidagi tinchlik kelishuviga vositachilik qilishga urinmoqda.
Gazeta uchrashuv yakunida tinchlik bitimi eʼlon qilinishi mumkinligini istisno etmadi.
Tahlilchilar Kavkaz davlatlari oʻrtasidagi muzokaralarni olib borish Rossiyadan AQShga oʻtayotgani haqida yozmoqda.
Soʻnggi vaqtlarda Ozarbayjon va Rossiya munosabatlari yoyomonlashdi, Armaniston ham AQShga yaqinlashishga urinmoqda.