Braziliya sobiq prezidenti uy qamogʻiga olindi
Jair Bolsonaru ijtimoiy tarmoqlar boʻyicha taqiqni buzganlikda ayblangan.
Braziliya sobiq prezidenti Jair Bolsonaru uy qamogʻiga olindi.
Braziliya Oliy sudi davlat toʻntarishiga urinishda ayblanib sudlanayotgan sobiq prezident Jair Bolsonaruni ijtimoiy tarmoqlardagi taqiqni buzgani uchun uy qamogʻiga olish haqida qaror chiqardi.
Sudya Aleksandr de Morayes qarorida sobiq prezident oʻz tarafdorlari, jumladan, parlament aʼzosi boʻlgan oʻgʻillarining ijtimoiy tarmoq platformalaridan Oliy sudga hujumlar uyushtirish va Braziliya adliya tizimiga chet elning aralashuviga chaqiruvchi xabarlar tarqatish uchun foydalanganini aytdi.
3 avgust kuni Braziliya shaharlarida Bolsonaru tarafdorlari mitinglari boʻlib oʻtdi. Uning oʻgʻillaridan biri Flavio Rio-de-Janeyrodagi olomonga murojaat qilish uchun miting paytida otasiga qisqa vaqt davomida imkon berdi. Keyinchalik u otasining tarafdorlariga murojaati aks etgan videoni ham eʼlon qildi. Keyinchalik post oʻchirildi.
"Qoʻllanilgan cheklov choralariga qoʻpol eʼtibor bermaslik shunchalik yaqqol namoyon boʻldiki, takror aytamiz, sudlanuvchining oʻgʻli, senator Flavio Nantes Bolsonaru qonun buzilishini yashirish uchun oʻzining Instagram sahifasidan postni oʻchirishga qaror qildi", deb yozdi Morayes.
Oliy sud, shuningdek, Bolsonaruga (sud tomonidan tasdiqlangan advokatlar yoki shaxslar bundan mustasno) oldiga keluvchilarni qabul qilishni va mobil telefondan foydalanishni taqiqladi.
Avvalroq sobiq prezidentga elektron bilaguzuk taqish, komendantlik soatiga rioya qilish, ijtimoiy tarmoqlardan foydalanmaslik va oʻgʻli Eduardo Bolsonaru bilan bogʻlanmaslik buyurilgan edi. Eduardo AQShda oʻz manfaatlari uchun lobbichilik qilayotgan va prezident Donald Trampga yaqin boʻlishda gumonlanmoqda.
Eslatib oʻtamiz, Bolsonaru Braziliyani 2019-2023 yillarda boshqargan. Soʻnggi saylovlarda u amaldagi prezident Lula da Silvaga yutqazgandi. Shundan soʻng unga nisbatan tergovlar boshlandi.