Andijonda oʻqituvchilar majburiy mehnatga jalb etildi
Holatni vazirlik tasdiqladi, ammo viloyat maktab taʼlimi boʻlimi buni ixtiyoriy hashar deb atadi.
2 avgust kuni Marhamat tumanidagi 42-maktabda ayol oʻqituvchilar sinf xonalarini taʼmirlayotgani aks etgan video tarqalgandi. Ushbu holatni mutasaddilar oʻrganib, ikki xil xulosa berishdi.
Andijon viloyati maktabgacha va maktab taʼlimi boʻlimining maʼlum qilishicha, ushbu hashar ixtiyoriy ravishda amalga oshirilgan.
"Ustozlarni oʻz lavozim majburiyatidan tashqari ishlarni bajarish holatini nazoratga olmagani sababli maktab direktori Z.M. egallab turgan lavozimidan ozod etilganini maʼlum qilamiz", deyiladi bayonotda.
Ammo Kambagʻallikni qisqartirish va bandlik vazirligi buning teskarisini bildirdi. Vazirlik matbuot xizmatiga koʻra, oʻqituvchilar mazkur ishlarga majburan olib chiqilgan.
"Maktab direktori Z.Mamajonovaga Maʼmuriy javobgarlik toʻgʻrisidagi kodeksning 51-moddasi 2-qismiga asosan bazaviy hisoblash miqdorining 100 baravari (41,2 mln soʻm – Platina.uz) miqdorida jarima qoʻllanildi", deyiladi munosabatda.
Shuningdek, vazirlik majburiy mehnatga duch kelganda dmi.mehnat.uz sayti yoki (71) 200-06-00 ishonch telefoniga murojaat qilishni eslatgan.
Maktabgacha va maktab taʼlimi vazirligi holat yuzasidan munosabat bergani yoʻq.