Prezident Turkmanistonga amaliy tashrif bilan boradi
BMTning Dengizga chiqish imkoni boʻlmagan rivojlanayotgan mamlakatlar boʻyicha koferensiyasi boʻlib oʻtadi.
Oʻzbekiston Respublikasi Prezidenti Shavkat Mirziyoyev Turkmanistonga boradi.
Prezident ushbu mamlakat rahbari Serdar Berdimuhamedovning taklifiga binoan Birlashgan Millatlar Tashkilotining Dengizga chiqish imkoni boʻlmagan rivojlanayotgan mamlakatlar boʻyicha uchinchi konferensiyasi tadbirlarida ishtirok etish uchun 4-5 avgust kunlari amaliy tashrif bilan ushbu mamlakatda boʻladi.
"Avaza" milliy sayyohlik zonasida boʻlib oʻtadigan tadbirda BMT Bosh kotibi Antoniu Guterrish, xorijiy davlatlar va hukumatlar, xalqaro va mintaqaviy tashkilotlar rahbarlari ishtirok etadi.
Konferensiya kun tartibidan transport jihatidan oʻzaro bogʻliqlikni mustahkamlash va savdo tartib-taomillarini soddalashtirish, iqtisodiy transformatsiya, iqlim oʻzgarishi va atrof-muhit uchun xatarlarga bardoshlikni oshirish, Barqaror rivojlanish maqsadlarini roʻyobga chiqarishda xalqaro hamkorlikni rivojlantirishning dolzarb masalalari oʻrin olgan. Avaza siyosiy deklaratsiyasi va harakatlar dasturining qabul qilinishi koʻzda tutilgan.
Oʻzbekiston yetakchisi Turkmanistonga tashrif doirasida Markaziy Osiyo davlatlari rahbarlarining yettinchi Maslahat uchrashuviga tayyorgarlik koʻrish masalalariga bagʻishlangan tadbirda ham ishtirok etadi hamda qator ikki tomonlama muzokaralar oʻtkazadi.