Iqtisodiy jinoyatlarga qarshi kurashish departamentining ikki amaldori ishdan olindi
Ular oʻz xohishiga koʻra ariza bergan va Departament organlaridan boʻshatilgan.
Iqtisodiy jinoyatlarga qarshi kurashish departamentining ikki amaldori oʻz arizasiga koʻra ishdan olindi. Bu haqda Bosh prokuratura xabar berdi.
Bosh prokurorning tegishli buyruqlari bilan:
Adliya katta maslahatchisi Inoyat Raxmatullayevich Shukurov oʻz xohishiga koʻra bergan arizasiga asosan egallab turgan Bosh prokuratura huzuridagi Iqtisodiy jinoyatlarga qarshi kurashish departamenti boshligʻining birinchi oʻrinbosari lavozimidan ozod qilindi va Departament organlaridan boʻshatildi.
Adliya katta maslahatchisi Muxammadjon Nabijonovich Ruzmatov oʻz xohishiga koʻra bergan arizasiga asosan egallab turgan Bosh prokuratura huzuridagi Iqtisodiy jinoyatlarga qarshi kurashish departamentining Toshkent shahar boshqarmasi boshligʻi lavozimidan ozod qilindi va Departament organlaridan boʻshatildi.
Avvalroq, Qoraqalpogʻiston bosh prokurori tayinlangandi.