Yevropa Ittifoqi Ukrainaga iqtisodiy yordamni toʻxtatib qoʻydi
Bunga Korrupsiyaga qarshi kurashish milliy byurosi va Korrupsiyaga qarshi ixtisoslashtirilgan prokuraturani amalda Bosh prokuraturaga boʻysundiruvchi qonun sabab boʻldi.
Yevropa Ittifoqi 25 iyul kuni Ukrainaga ajratiladigan umumiy 4,5 milliard yevro jamgʻarmadan 1,5 milliard yevrolik yordamni ushlab qolishini eʼlon qildi.
Bu Korrupsiyaga qarshi kurashish milliy byurosi (NABU) va ixtisoslashtirilgan antikorrupsiya prokuraturasini (SAPO) Bosh prokuraturaga boʻysundirish natijasi boʻldi, deb yozadi The New York Times.
Ukrainaga yordam fondi Yevropa Ittifoqi tomonidan 2024 yilda tuzilgan. Urush oqibatida yetkazilgan zararni bartaraf etish va mamlakatni YeIga kirishga tayyorlash uchun uch yil davomida 50 milliard yevro ajratish rejalashtirilgan.
Ushbu fonddan moliyalashtirish harbiy xaridlar uchun ishlatilmaydi va Kiyevning boshqaruv standartlari sohasidagi yutuqlariga bogʻliq.
Yevrokomissiya matbuot kotibi Guillaume Mercier jurnalistlarga Ukraina iyun oyida 16 mezondan uchtasini bajara olmaganiga, jumladan, korrupsiyaga qarshi ixtisoslashtirilgan sudga sudyalarni tayinlamaganiga qaramay, fonddan mablagʻ soʻraganini aytdi.
NYT yordamning toʻxtatilishini Yevropa Ittifoqining urush davrida ichki siyosat masalalari boʻyicha Zelenskiy hukumatini tanqid qilishga yangidan tayyorligi belgisi deb ataydi.
Shuningdek, u Ukrainaning Gʻarb ittifoqchilari oʻrtasida Zelenskiyga boʻlgan ishonch soʻnib ketayaptimi degan savol tugʻildi, deb yozadi gazeta.
Biroq, 1,5 milliard yevroni ushlab qolish qarori yakuniy emas - agar Ukraina maʼlum mezonlarga javob bersa, moliyalashtirish qayta tiklanishi mumkin, deya taʼkidlaydi nashr.
22 iyul kuni Ukraina Oliy Radasi Korrupsiyaga qarshi kurashish milliy byurosi (NABU) va Korrupsiyaga qarshi ixtisoslashtirilgan prokuraturani (SAPO) amalda Bosh prokuraturaga boʻysundiruvchi va ularni mustaqillikdan mahrum qiluvchi qonunni maʼqulladi va prezident Zelenskiy uni darhol imzoladi.
Shundan soʻng Kiyev, Odessa, Lvov, Dnepr, Xarkov va boshqa shaharlarda norozilik namoyishlari boshlandi.
Zelenskiyning aytishicha, u namoyishchilarning fikrini tinglangan va 24 iyul kuni u Oliy Radaga yangi qonun loyihasini taqdim etgan. Ukraina prezidentining soʻzlariga koʻra, yangi qonun loyihasida korrupsiyaga qarshi kurashuvchi idoralarni Rossiya taʼsiridan himoya qilish choralari koʻzda tutilgan.
Financial Times nashri manbalarga asoslanib xabar berishicha, Oliy Radaning 70 ga yaqin deputati, prezidentning “Xalq xizmatchisi” partiyasi aʼzolari yangi qonun loyihasi uchun ovoz berishdan qoʻrqishadi – ular “qasos uchun adolatsiz javobgarlikka tortilishidan qoʻrqishadi”.