Andijonda yana 37 milliard soʻmdan oshiq pul ajratiladi
Shundan 3,7 milliard soʻmi maxsus dastur doirasida tibbiyot muassasalari uchun sarflanadi.
Xalq deputatlari Andijon viloyati kengashi pul ajratish boʻyicha navbatdagi qarorini chiqardi. Qaror 2025 yil 24 iyul kuni eʼlon qilingan.
Unga koʻra, Andijon viloyati viloyat byudjetining 2025 yil 2-chorak daromadlar rejasini orttirib bajarilgan qismi hisobidan tegishli tashkilot va muassasalarga jami 33 050 (oʻttiz uch milliard ellik) million soʻm;
- Prezidentning 19.05.2025 yildagi PQ-185-son qaroriga asosan “Tibbiyotda 90 kunlik oʻzgarishlar vaqti” dasturi ijrosi uchun tibbiyot muassasalariga 2-ilovaga muvofiq jami 3 700 (uch milliard yetti yuz) million soʻm;
- Andijon viloyatining Qirgʻiziston Respublikasi bilan chegaradosh boʻlgan hududlariga kuzatuv kameralarini oʻrnatish xarajatlari uchun 3-ilovaga muvofiq tumanlar mahalliy byudjetlariga 342,0 (uch yuz qirq ikki) million soʻm;
- umumiy jami 37 092,0 (oʻttiz yetti milliard toʻqson ikki) million soʻm miqdorida mablagʻlar ajratiladi.
Mablagʻlar quyidagicha taqsimlanadi: chegara harbiy qismlarini taʼmirlash va texnikalar uchun 5 mlrd soʻm, viloyat hokimligi maʼmuriy binosini qoʻriqlashdagi qarzni yopish uchun 1,5 mlrd soʻm, tarixiy "Boburnoma" filmini olish uchun 2 mlrd soʻm, Paxtaobod tumani tugʻruq birlashmasini taʼmirlash uchun 2 mlrd 62 mln soʻm, tumandagi yoʻllarni asfaltlash ishlariga 4,5 mlrd beriladi.
Bundan tashqari viloyatdagi tibbiyot muassasalariga 3,7 mlrd soʻm beriladi.
Kuni kecha ham viloyat byudjetidan 15 mlrd soʻm ajratilgandi.