Transport egalarining fuqarolik javobgarligini majburiy sugʻurta qilish summasi ikki barobarga oshiriladi

Transport egalarining fuqarolik javobgarligini majburiy sugʻurta qilish summasi 80 mln soʻmga oshiriladi.

Vazirlar Mahkamasining 2025 yil 23 iyuldagi “ Prezidentning “Sugʻurta xizmatlari bozorini yanada rivojlantirishning kompleks chora-tadbirlari toʻgʻrisida” qarori ijrosini taʼminlash chora-tadbirlari haqida”gi qarori qabul qilindi. Bu haqda Istiqbolli loyihalar agentligi xabar berdi.

Qaror bilan:

- transport vositalari egalarining fuqarolik javobgarligini majburiy sugʻurtasiga tegishli oʻzgartirishlar kiritildi:

-aktuar hisob-kitoblar asosida sugʻurta tariflari qayta koʻrib chiqilib, sugʻurta summalari va mukofotlari bozor tamoyillariga muvofiqlashtirildi.

2026 yil 1 yanvardan boshlab transport vositalari egalarining fuqarolik javobgarligini majburiy sugʻurta qilish boʻyicha sugʻurta summasini 80 mln soʻmgacha (amalda 40 mln soʻm) oshirilishi belgilandi, bu oʻz navbatida YTH natijasida jabrlangan shaxslarning mol-mulkiga, hayotiga va sogʻligʻiga yetkazilgan zarar miqdorini qoplash uchun yoʻnaltiriladigan mablagʻning bugungi kun talabiga mos ravishda boʻlishiga xizmat qiladi;

-haydovchilar soniga qarab cheklangan va cheklanmagan polislarni rasmiylashtirish mexanizmi belgilandi. Bunda aybdor deb topilgan sugʻurta qildiruvchining sugʻurtalovchisi tomonidan sugʻurta daʼvolari va boshqa nizolarni koʻrib chiqish tartibi aniqlashtirildi;

- Sugʻurta toʻlovlarini kafolatlash jamgʻarmasiga transport vositalari egalarining fuqarolik javobgarligini majburiy sugʻurtasi bilan bogʻliq masalalar yuzasidan huquqiy maslahat hamda YTH toʻgʻrisidagi xabarnoma bilan bogʻliq adjasterlik xizmatini koʻrsatish funksiyasi qoʻshildi;

- majburiy sugʻurtalash majburiyatining bajarilishini nazorat qilish uchun masʼul organlar va Yagona avtomatlashtirilgan axborot tizimini yuritish tartibi aniqlashtirildi;

- manfaatdor davlat organlari bilan majburiy sugʻurta boʻyicha elektron maʼlumot almashinuvi yoʻlga qoʻyilishi belgilandi;

- 2026 yil 1 apreldan Yagona sugʻurta billing tizimi joriy etiladi. Bu polislarni rasmiylashtirishda sugʻurta mukofotlari tushumlarining markazlashtirilgan hisobini yuritilishini taʼminlaydi;

- fuqarolik javobgarligini majburiy sugʻurta qilmagan shaxslarni maʼmuriy javobgarlikka tortish mexanizmlarini takomillashtirishni nazarda tutuvchi qonun loyihasini Vazirlar Mahkamasiga kiritish topshirildi.