Surxon davlat qoʻriqxonasida yirik yongʻin roʻy berdi
Sherobod tumaniga qarashli hududdagi hodisa qariyb 8 soatda bartaraf etilgan.
Surxon davlat qoʻriqxonasidagi yongʻin 8 soatda oʻchirildi.
Surxondaryo viloyati, Sherobod tumani, Koʻxitang togʻ etaklarida Surxon davlat qoʻriqxonasi hududiga qarashli yer maydonida oʻrmon yongʻinlari kuzatilgan.
23 iyul kuni soat 15:52 da Surxondaryo viloyati FVBga Sherobod tumani, “Qizilolma” MFY hududida joylashgan Surxon davlat qoʻriqxonasiga qarashli hududda taxminan 5 gektar maydonda quruq oʻt yonayotganligi toʻgʻrisida xabar kelib tushgan.
Mazkur xabarga asosan, yongʻin-qutqaruv ekipajlari qutqaruvchilari, tegishli tashkilotlar xodimlari voqea joyiga yetib borishgan. Ushbu yongʻinni bartaraf qilish uchun yetarli kuch va vositalar jalb qilingan.
Xabarga koʻra, yongʻin soat 00:35 da oʻchirilgan.
Jabrlangan va halok boʻlganlar haqida xabar kelib tushmagan.
Avvalroq Olmazor tumanida vodorod periks moddasi havoga sizib chiqqandi.