Andijonda byudjetdan salkam 15 mlrd soʻm pul ajratilmoqda
Pullar viloyat hokimligi, futbol hamda kurash tashkilotlari va boshqalarga beriladi.
Xalq deputatlari Andijon viloyati kengashi mablagʻ ajratish boʻyicha qarorni imzoladi. Qaror 2025 yil 23 iyul kuni chiqarilgan.
Unga koʻra, Andijon viloyati viloyat byudjetining 2025 yil 2-chorak daromadlar rejasini orttirib bajarilgan qismi hisobidan ilovaga muvofiq tegishli tashkilot va muassasalarga jami 14 mlrd 815 million soʻm miqdorida mablagʻlar ajratiladi.
Jumladan, shahar va tumanlar hokimliklari huzuridagi "Fuqarolar tashabbuslari jamgʻarmasi" taqsimotiga asosan 10 mlrd soʻm ajratiladi. Viloyat hokimligi xodimlarining 2025 yil 3-chorak ish haqida qoʻshimcha sifatida 2 mlrd 680 mln soʻm beriladi, futbol assotsiatsiyasi viloyat boʻlimiga ish haqi uchun 200 mln, tadbir xarajatlari uchun yana 200 mln soʻm beriladi.
Kurash federatsiyasiga "Xonobod open" turnirin oʻtkazish uchun 1 mlrd soʻm taqdim etilishi koʻzda tutilgan. Ushbu federatsiyasiga ish haqi xarajatlari uchun yana 200 mln soʻm oʻtkaziladi.
Avvalroq Toshkentda 81,5 mlrd soʻm ajratilgandi.