Isroil Suriya bosh shtabi qarorgohiga zarba berdi
Suriyaning Suvayda provinsiyasida yuz bergan mojaroda oʻnlab odamlar halok boʻldi. Isroil mahalliy druzlarga yordam berish bahonasida vaziyatga aralashmoqda.
Isroil mudofaa kuchlari Damashqdagi Suriya bosh shtabi qarorgohiga zarba berganini maʼlum qildi. Bayonot X tarmogʻida eʼlon qilingan.
“Isroil kuchlari Suriya janubidagi druzlar tinch aholiga qarshi voqealar va harakatlarni kuzatishda davom etmoqda va siyosiy rahbariyat koʻrsatmalariga muvofiq hududga zarbalar bermoqda”, deydi yahudiy armiyasi vakili.
Suriya matbuotiga koʻra, Isroilning Damashqqa bergan zarbasi oqibatida ikki nafar tinch aholi vakili yaralangan.
Bir kun avval Isroil armiyasi Suriya janubidagi Suvayda viloyatida hukumat kuchlariga qarshi zarbalar berdi.
Asosan druzlar istiqomat qiladigan shaharchada badaviylar va mahalliy jangarilar oʻrtasidagi toʻqnashuvlarda 30 dan ortiq odam halok boʻlgan edi. Isroil druzlar ozchiligini himoya qilish uchun harakat qilayotganini iddao qildi.
Suvaydadagi toʻqnashuvlar oʻtgan yilning dekabrida Bashar Asad hokimiyatdan agʻdarilganidan keyin mazhablararo zoʻravonliklarning birinchi misolidir.