Buxoroda kadastr filiali bosh mutaxassisi qoʻlga olindi
U 5 sotix yerni fuqaro nomiga rasmiylashtirib berish evaziga pul talab qilgan.
Gʻijduvon tumanida 5 sotix yer maydoni olib berishni vaʼda qilgan kadastr filiali bosh mutaxassisi ushlandi.
Bosh prokuratura huzuridagi Departamentning Gʻijduvon tumani boʻlimi va DXX xodimlari hamkorligida tezkor tadbir oʻtkazilgan.
Unda Davlat kadastrlari palatasi Gʻijduvon tumani filiali shoʻʼba bosh mutaxassisi A.I. fuqaro Oʻ.J.ga “Bobur” MFY hududidagi 5 sotix yer maydoni goʻyoki tuman hokimligi zaxirasida turganligini aytib, ushbu yer maydonini 4 000 AQSh dollari evaziga uning nomiga kadastr hujjatlarini rasmiylashtirib berishini vaʼda qilgan. Soʻngra oldindan 2 000 AQSh dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 25, 168-moddasi (firibgarlik) bilan jinoyat ishi qoʻzgʻatilib, tergov harakatlari oʻtkazilmoqda.
Avvalroq Toshkent va Fargʻonada universitet oʻqituvchilari qoʻlga olingandi.