Ulugʻbek Rashitov ikki yilga diskvalifikatsiya qilindi
U antidoping qoidalarini buzganlikda aybdor deb topildi.
Olimpiya chempioni Ulugʻbek Rashitov uzoq muddatga diskvalifikatsiya qilindi.
Taekvondo boʻyicha ikki karra Olimpiya chempioni, oʻzbekistonlik taekvondochi Ulugʻbek Rashitov antidoping qoidalarini buzganlikda aybdor deb topildi va ikki yilga diskvalifikatsiya qilindi.
Bu haqda Xalqaro dopingtahlil agentligi (ITA) rasmiy bayonotida qayd etilgan.
Aytilishicha, sportchi soʻnggi 12 oy ichida uch marta oʻzining joylashuvi haqida notoʻgʻri maʼlumot bergan. Bu harakat antidoping qoidalariga koʻra, sinovdan bosh tortish bilan tenglashtiriladi va jiddiy qoidabuzarlik hisoblanadi.
Sportchining musobaqalardan chetlashtirilish muddati 2025 yil 13 maydan 2027 yil 12 maygacha etib belgilandi.
Eslatib oʻtamiz, Rashitov 2020 vva 2024 yilgi olimpiada oʻyinlarida chempion boʻlgandi.