Oʻzbekistonda IELTS imtihonini qogʻozda topshirish bekor qilinmoqda
Bu qaror qogʻozdagi test javoblarining internetga chiqib ketishi ortidan, operatsion sabablarga koʻra qabul qilingan.
11 iyuldan Oʻzbekistonda IELTS imtihonini qogʻozda topshirish bekor qilinadi. Bu haqda IELTS imtihonini oluvchi IDP (Edu-Action Centre) tashkiloti oʻz Telegram sahifasida xabar berdi.
IDP maʼlumotiga koʻra, 11 iyuldan boshlab IELTS imtihonini faqat kompyuterda topshirish mumkin boʻladi.
Bu qaror qogʻozdagi test javoblarining internetga chiqib ketishi ortidan, operatsion sabablarga koʻra qabul qilingan. Bunday holatlar imtihon natijalarining ishonchliligiga shubha tugʻdiradi va xalqaro akkreditatsiya talablariga zid hisoblanadi.
Qogʻozda topshirish uchun roʻyxatdan oʻtgan abituriyentlar imtihonni kompyuterda bepul topshirishi yoki toʻlovni toʻliq qaytarib olishi mumkin.
Bu oʻzgarish faqat Oʻzbekiston hududida amalga tatbiq etiladi.
Imtihonda Reading (oʻqish), Writing (yozish) va Listening (tinglash) boʻlimlari kompyuterda oʻtkaziladi, ammo Speaking (soʻzlashuv) testi anʼanaviy tarzda, yaʼni imtihon oluvchi bilan yuzma-yuz suhbat koʻrinishida boʻladi.
Nomzod uchun test formati, savol turlari, har bir boʻlimga ajratilgan vaqt va mazmun oʻzgarishsiz qoladi.
Kompyuterda topshirilgan IELTS natijalari 1 dan 5 ish kuni ichida tayyor boʻladi. Anʼanaviy qogʻozda topshiriladigan imtihon natijalari esa 13 kunda eʼlon qilinardi.