Guliston shahar prokurori oʻrinbosari ham qoʻlga olindi
U jinoyat ishi doirasida "qamoq" ehtiyot chorasi qoʻllamaslik hamda keyinchalik ishni gumonlanuvchi foydasiga hal qilib berish evaziga pul soʻragan.
Sirdaryo viloyatida kuzatilgan holatda Guliston shahar prokurori oʻrinbosari qoʻlga olindi.
U oʻz xizmat mavqeidan foydalanib, Boyovut tumanida qishloq xoʻjaligi sohasida faoliyat yurituvchi MChJ rahbariga nisbatan Boyovut tumani IIB Tergov guruhi ish yurituvidagi Jinoyat Kodeksining 168- va 167-moddalari bilan qoʻzgʻatilgan jinoyat ishi doirasida “qamoq” ehtiyot chorasi qoʻllamaslik hamda keyinchalik ishni gumonlanuvchi foydasiga hal qilib berish evaziga 10 ming AQSh dollari miqdorida pora soʻraydi.
Davlat havfsizlik xizmati xodimlari tomonidan oʻtkazilgan tezkor tadbirda qonun himoyachisi talab qilingan pul mablagʻini oʻz xizmat xonasida olgan vaqtida ashyoviy dalillar bilan ushlandi.
Hozirda prokuror oʻrinbosariga nisbatan Jinoyat Kodeksining 168 va 28,211-moddasi bilan jinoyat ishi qoʻzgʻatildi.
Holat yuzasidan mazkur mansabdor shaxsga nisbatan “qamoq” ehtiyot chorasi qoʻllanilib, tergov harakatlari olib borilmoqda.
Avvalroq Sharof Rashidov tumani hokimi ushlangani xabar berilgandi.