Alkogol mahsulotlarini reklama qilgan korxona jarimaga tortildi
“Reklama toʻgʻrisida”gi qonunning 38-moddasiga asosan, har qanday quvvatdagi alkogol mahsulotlarining reklamasiga yoʻl qoʻyilmaydi.
Toshkent viloyatida alkogol mahsulotlarini reklama qilgan korxona jarimaga tortildi.
Raqobat qoʻmitasining Toshkent viloyati hududiy boshqarmasi tomonidan OAV, internet tarmoqlarida hamda tashqi reklama vositalarida joylashtirilgan reklama materiallarining reklama toʻgʻrisidagi qonunchilik talablariga mosligi yuzasidan tizimli ravishda oʻrganish ishlari olib borildi.
Oʻrganish ishlari natijasida, viloyatda faoliyat olib boruvchi “LUTFILLA FAYZ” MChJ tomonidan alkogol vositalari reklamasini qoʻyish holatlari aniqlandi. Bu esa “Reklama toʻgʻrisida”gi qonunning 38-moddasiga asosan, har qanday quvvatdagi alkogol mahsulotlarining reklamasiga yoʻl qoʻyilmasligi belgilab qoʻyilgan.
Aniqlangan qonunbuzilish holatiga muvofiq, hududiy boshqarma Maxsus komissiyasi tomonidan “Reklama toʻgʻrisida”gi Qonuni talablari buzilishi alomatlari boʻyicha Vazirlar Mahkamasining 225-sonli qarori bilan tasdiqlangan Nizomiga muvofiq “LUTFILLA FAYZ” MChJga nisbatan belgilangan tartibda ish qoʻzgʻatilib, ishni koʻrib chiqish yakunlari boʻyicha moliyaviy jarima qoʻllash yuzasidan qaror qabul qilindi.
Shuningdek, qonunbuzilish holatini bartaraf etish va kelgusida yoʻl qoʻymaslik yuzasidan koʻrsatma berildi.
Avvalroq Raqobat qoʻmitasi 3 mlrd soʻmdan oshiq xaridlarda qonun buzilganini maʼlum qilgandi.