Fargʻonada qoidalarni mensimaydigan "Malibu" aniqlandi
Uning haydovchisi viloyat YHXB boshligʻining rafiqasi ekani aytilmoqda.
Fargʻona viloyati IIB Yoʻl harakati xavfsizligi xizmati xodimlari tomonidan qoidabuzarliklari bekor qilingan Malibu mashinasi viloyat IIB YHXB boshligʻi podpolkovnik Akmal Ahmedovning turmush oʻrtogʻiga tegishli boʻlgani aytilmoqda.
Ijtimoiy tarmoqlarda Fargʻona viloyatida Malibu mashinasi sodir etgan yuzdan ortiq qoidabuzarliklar asossiz bekor qilingan. Bu kabi xabarlar tarqalgach, viloyat IIB YHXB munosabat bildirib, holat yuzasidan xizmat tekshiruvi oʻtkazilgani va Yoʻl harakati xavfsizligi xizmati boshqarmasining 5 nafar xodimiga nisbatan intizomiy jazo tayinlanganini bildirgan.
Shuningdek, munosabatda Malibu mashinasida sodir etilgan barcha qoidabuzarliklar boʻyicha jarimalar undirilgani aytilgan. Maʼlum boʻlishicha, 2024-2025 yillarda ushbu mashina tomonidan sodir etilgan jami 61 ta qoidabuzarlik boʻyicha jarimalar bekor qilingan.
Tarmoqlarda tarqalgan videoda Malibu bir nechta holatda svetoforning qizil chirogʻida ham harakatlanganini koʻrish mumkin. Bundan tashqari, xabarlarda ushbu avtomobil 100 dan ortiq qoida buzgani, lekin qoidabuzarlik haqidagi qarorlar "oxirgi zarurat yuzasidan sodir etilgani sababli" oʻchirtirilgani aytilgan.