Erdoʻgʻon Ozarbayjon va Rossiya oʻrtasidagi vaziyatga munosabat bildirdi

Turkiya Ozarbayjon va Rossiya oʻrtasidagi tarang vaziyatning yechim topishiga va bu ikki davlat munosabatlariga hech qanday putur yetkazmasligiga umid qilmoqda.

Bu haqda Turkiya prezidenti Rajab Toyyib Erdoʻgʻon Ozarbayjonga tashrifi chogʻida gapirdi deya xabar berdi CNN Turk telekanali.

"Asosiy tilagimiz shuki, bu noxush hodisalar ikki davlat oʻrtasidagi munosabatlarga tuzatib boʻlmas ziyon yetkazmasin. Mahalliy kelishmovchiliklarni mavjud vaziyatdan tashqariga olib chiqmasdan ham hal qilish mumkin va buning uchun xotirjamlikni saqlash nihoyatda muhim", - dedi u.

Erdoʻgʻonning soʻzlariga koʻra, ikkala davlat ham “bu inqirozni yengib oʻtish uchun yetarli donolikka ega”, Turkiya “hal qilishga qaratilgan konstruktiv qadamlarni” qoʻllab-quvvatlaydi.

"Kavkaz endi yangi qarama-qarshilikka dosh berolmaydi", deb hisoblaydi prezident.

Uning qoʻshimcha qilishicha, u Ozarbayjon prezidenti Ilhom Aliyev bilan vaziyatni muhokama qilgan, u "oʻta ehtiyotkor va provokatsiyalarga berilmasdan va mojaro qoʻzgʻatmasdan harakat qiladi".

Rossiya-Ozarbayjon munosabatlarining keskinlashishiga iyun oyi oxirida ozarbayjon diasporasi vakillarining Yekaterinburgda hibsga olinishi sabab boʻlgan. Bu 2001, 2010 va 2011 yillarda sodir etilgan ikkita qotillik va odam oʻldirishga urinish boʻyicha tergov harakatlari bilan bogʻliq edi. Natijada oʻnga yaqin ayblanuvchi hibsga olindi.

Ayni vaqtda ikki gumonlanuvchi vafot etgan. Rossiya Tergov qoʻmitasi maʼlumotlariga koʻra, ulardan biri yurak yetishmovchiligidan vafot etgan, ikkinchisining oʻlimi sabablari aniqlanmoqda.

Ozarbayjonda sud-tibbiyot ekspertlari jasadlarda jarohat izlari borligini maʼlum qilgan, Boku prokuraturasi qasddan odam oʻldirish, qiynoqlar va mansab vakolatlarini suiisteʼmol qilish moddalari boʻyicha jinoiy ish ochgan.

Buning ortidan respublikada "Sputnik Ozarbayjon" tahririyati xodimlari qoʻlga olindi, ularning bir qismi qoʻyib yuborildi. Ammo ijrochi direktor Igor Kartavyx va bosh muharrir Yevgeniy Belousov firibgarlik, noqonuniy tadbirkorlik va pul yuvishda ayblanib hibsga olingan.

Rossiyaliklarning yana bir guruhi giyohvand moddalar savdosi va kiberjinoyatchilikka aloqadorlikda gumonlanib hibsga olindi.