Shavkat Mirziyoyev Mulla Abdul Gʻani Barodarni qabul qildi
Uchrashuv Xonkendi shahrida, Iqtisodiy hamkorlik tashkiloti sammiti doirasida boʻlib oʻtgan.
Oʻzbekiston Respublikasi Prezidenti Shavkat Mirziyoyev Xonkendi shahridagi Iqtisodiy hamkorlik tashkiloti sammiti doirasida Afgʻoniston Bosh vazirining iqtisodiy masalalar boʻyicha oʻrinbosari vazifasini bajaruvchi Mulla Abdul Gʻani Barodarni qabul qildi.
Savdo-iqtisodiyot, transport-logistika, energetika sohalaridagi oʻzaro manfaatli hamkorlikni yanada kengaytirishning dolzarb jihatlari muhokama qilindi.
Tovar ayirboshlash hajmi va qoʻshma korxonalar soni barqaror ortib borayotgani alohida mamnuniyat bilan qayd etildi.
Amaliy aloqalar faollashdi. Joriy yilning may oyida Kobul va Mozori Sharif shaharlarida Oʻzbekiston savdo uylari ochildi. Iyun oyida Imtiyozli savdo toʻgʻrisidagi bitim imzolandi.
Oʻzbekiston yetakchisi chegaraoldi savdo va tegishli infratuzilmani yanada rivojlantirish, qazib chiqarish, toʻqimachilik va farmatsevtika tarmoqlarida, qurilish materiallari tarmoqlarida, qishloq xoʻjaligi mahsulotlarini qayta ishlash va boshqa yoʻnalishlarda kooperatsiya loyihalarini ilgari surish muhimligini taʼkidladi.
Strategik muhim mintaqaviy loyiha - Transafgʻon temir yoʻlini qurish loyihasini jadallashtirish zarurligi qayd etildi.